भांगरभूंय | प्रतिनिधी
अॅम्बुलन्सी १०८ सेवे कडेन जोडटले
पणजी : दक्षीण गोंय जिल्लो हॉस्पिटल, काणकोण, केपेंचीं हॉस्पिटलां तशेंच उपजिल्लो हॉस्पिटलांत उणाव आशिल्ले दोतोर, नर्सी तशेंच हेर कर्मचार्यांची भरती म्हयन्यां भितर करून मनीसबळाचो उणाव पयस करपाचो निर्णय सरकारान घेतला. दक्षीण गोंयांतल्या सरकारी हॉस्पिटलांनी सादन सुविदेतले उणाव भरून काडून दर्जो वाडोपाचो निर्णय उचेल्या पावंड्यावेले बसकेंत जाला.
मुख्यमंत्री डॉ. प्रमोद सावंत हांच्या फुडारपणा खाला पर्वरी मंत्रालयांत बुधवारा हॉस्पिटलांचे स्थितीविशीं बसका जाली. भलायकी मंत्री विश्वजीत राणे, दक्षीण गोंयांतले संबंदीत आमदार आनी भलायकी खात्याचे अधिकारी बसकेक हाजीर आशिल्ले.
जिल्लो हॉस्पिटला सयत काणकोण आनी केपेंचें हॉस्पिटल तशेंच फोंडेंच्या उपजिल्लो हॉस्पिटलांतल्या सुविधांचो नियाळ बसकेंत घेतलो. ह्या हॉस्पिटलांनी आनीक कसल्या सुविदांची गरज आसा, ताचेर चर्चा जाली. गरजेचे आसा ते दोतोर तशेंच हेर कर्मचार्यांची भरती म्हयन्या भितर जातली, अशी म्हायती डॉ. सावंत हांणी बसके उपरांत दिली.
सगल्यो अॅम्बुलन्सी १०८ सेवेकडेन जोडटले
गांवगिर्या वाठारांनी जायते खेपो वेळार अॅम्बुलन्स पावनात. हाचेर उपाय म्हूण अॅम्बुलन्सी वाडोवपाची गरज आसा. तशेंच सगल्या सरकारी हॉस्पिटलांच्यो अॅम्बुलन्सी १०८ सेवेकडेन जोडटले, अशी म्हायती बसके उपरांत भलायकी मंत्री विश्वजीत राणे हांणी दिली.
हॉस्पिटलांनी फिजीओथेरापिस्ट, दोतोर आनी तंत्रीक कर्मचार्यांचो उणाव आसा. हे विशींचो नियाळ बसकेंत घेतलो. दक्षीण गोंय जिल्लो हॉस्पिटला सयत हेर हॉस्पिटलांनी मनीसबळ उपलब्ध जातले. सादनसुविदां मदीं आशिल्ल्या उणावांचो नियाळ घेतला. हो उणाव पयस करून जनतेक बर्यात बरी भलायकी सेवा दिवपाचे येत्न आसा, अशें मंत्री राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
