भांगरभूंय | प्रतिनिधी
पणजी : ऑनलायन ‘मॅट्रिमोनियल’ जाळ्यांत घुस्पोन इंदिरा नगर, चिंबलाचे एके तरणाटेन १.३९ लाख रुपया वगडायले. फटींगपणां जाल्ल्याचें समजतांच तिणें पोरणें गोंय पुलीस स्टेशनांत कागाळ नोंद केली. ह्या प्रकरणांत पुलिसांनी अनवळख्यां आड गुन्यांव नोंद केलो.
ऑनलायन ‘मॅट्रिमोनियल’ सायटीवेल्यान एक तरणाटी एका तरणाट्याच्या संपर्कांत आयली. तातुंतल्यानूच ऑनलायन फटींगपणाच्या जाळ्यांत आडकली. संपर्कांत आयिल्ल्या तरणाट्यान एक सामकें मोलादीक सामान आशिल्लें पार्सल धाडटां अशें तिका सांगलें. उपरांत तिका फोन येवपाक लागले आनी कॉरियर एजंट आनी कस्टम अधिकारी उलयतां अशें सांगून पार्सल धाडपा खातीर पयशे धाडपाक लायले. उपरांत ते तरणाटेन युपीआय वरवीं पयशे धाडले आनी पार्सलाची वाट पळोवपाक लागली. मात, निमाणें मेरेन पार्सल येवंकूच ना आनी फोन केल्ल्यांचो मोबायलूय बंद मेळपाक लागलो. उपरांत तिचे वांगडा फटींगपणां जाल्ल्याचें समजतांच तिणें कागाळ नोंद केली. तरणाटेचे कागाळीवेल्यान पोरणें गोंय पुलिसांनी अनवळख्यां आड फटींगपणाचो गुन्यांव नोंद केल्ल्यान, सध्या तपास सुरू आसा.
मजगतीं, अनवळख्या कडेन ऑनलायन वेव्हार करतना सतर्कताय बाळगुची आनी खात्री जायनासतना पयशे धाडचे न्हय. ऑनलायन वेव्हाराच्या फटींगपणाच्या जाळ्यांत आडकून हातांतले वगडावचें न्हय, असो उलो पुलिसांनी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
