भांगरभूंय | प्रतिनिधी
पणजी : जानेवारी २०२५ सावन आतां मेरेन अमेरिकेंतल्यान ३० गोंयकारांक धांवडायिल्ल्याची म्हायती परराष्ट्र मंत्रालयान जाहीर केल्ले आंकडेवारींतल्यान मुखार आयल्या. बेकायदेशीर प्रवेश, व्हिसाची मुजत सोंपले उपरांतूय रावप आनी वैध कागदपत्रांचो उणाव हीं तांकां अमेरिकेंतल्यान धांवडावपा फाटलीं मुखेल कारणां जावन आसा, अशें केंद्र सरकारान स्पश्ट केलां.
मात, स्वताचे इत्सेन परतल्ल्याची नोंद जायते फावटीं जायनाशिल्ल्यान प्रत्यक्ष आंकडो आनीक आसपाक शकता, अशें अधिकार्यांनी सांगलें. परराष्ट्र मंत्रालयाचे आंकडेवारी प्रमाण, जानेवारी ते डिसेंबर २०२५ ह्या काळांत वट्ट ३२५८ भारतीय नागरिकांक अमेरिकेंतल्यान भारतांत धाडले. धांवडायिल्ल्यां मदीं पंजाब आनी हरियाणा ह्या राज्यांची अदीक आंकडो आसा. उपरांत गोंय आनी उत्तर प्रदेशाचो क्रमांक लागता.
गोंय राज्य एनआरआय कार्यालया कडेन उपलब्ध म्हायती प्रमाण; धांवडायले उपरांत १५ गोंयकार राज्यांत परतल्यात. एमईएच्या आंकडेवारी प्रमाण, जुलय २०२५ मेरेन २६ गोंयकारांक धाडिल्ले. जाल्यार नोव्हेंबराचे निमाणे कडेन ही संख्या ३० चेर पावली.
परराष्ट्र मंत्रालयाचे म्हायती प्रमाण, कांय फावटीं अवैध प्रवासी कागदपत्रां आशिल्ल्या बेकायदेशीर स्थलांतरितांक संबंदीत सरकार सरळ परत धाडटात. कागदपत्रां बगर रावप्यांक दिवपी ‘इमर्जन्सी ट्रॅव्हल डॉक्युमेंट्स’ सगलेच फावटीं वापरीनात. कारण ताका लागून संबंदीत मनशांक धांवडावपा आड अपील करपाची संद मेळटा. हाका लागूनय आंडेवारींत बोवाळ निर्माण जावपाक शकता. जायते जाण नेमान वेवसायीक विमानसेवेन भारतांत जरी परतले तरी कांय जाणांक अमेरिकेच्या ‘इमिग्रेशन अँड कस्टम्स एनफोर्समेंट’ वा ‘यूएस कस्टम्स अँड बॉर्डर प्रोटेक्शन’ हांच्या चार्टर विमानां वरवीं परत धाडले.
गोंयचे एनआरआय आयुक्त नरेंद्र सावयकार हांणी सांगलें, आमचे कडेन १५ जाण परतल्ल्याची नोंद आसा. मात, जायते जाण कारवायेच्या भंयान वा नोकरी वचपाचे शक्यतायेक लागून स्वताचे इत्सेन अमेरिका सोडटात. अश्या प्रकरणांची औपचारीक नोंद जायना, हाका लागून आंकडेवारी बदलत रावता. धांवडावपा मजगतीं संबंदीत नागरिकांक बरी वागणूक मेळची; हे खातीर परराष्ट्र मंत्रालय अमेरिकेंतल्या अधिकार्यां कडेन सेगीत संपर्कांत आसा, अशें तांणी म्हणलें.
महाराष्ट्र, दिल्ली, तेलंगणा, तामिळनाडू, आंध्र प्रदेश, उत्तराखंड आनी कर्नाटक ह्या राज्यांतल्या नागरिकांचोय धांवडायिल्ल्यां मदीं आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
