भांगरभूंय | प्रतिनिधी
कर बुडोवप हो समाजीक अन्याय. कारण ताचो फटको निमणो सामान्य भौसाकूच बसता.
खणी बंद जाले उपरांत सरकारी तिजोरेंत कराच्या रुपांत येणावळ येवची म्हूण कॅसिनोक उर्बा मेळत गेली. दोनाचे चार जाले, चाराचे आठ. तातूंत आनीकूय भर पडपाची आसा खंय. पणजेकारांचो ताका विरोध आसा. तशें निवेदनूय दिलां. पूण, सरकारी तिजोरी सध्या कॅसिनोचे धिगयेचेर उबी आशिल्ल्यान ह्या आधुनिक जुगार केंद्रांक धोको ना. ह्या कॅसिनोंनी सरकाराक 314 कोटींची ‘दोन पानां’ केल्ल्याचें दिसून आयलां. बंद पडिल्ल्या तीन कॅसिनों कडल्यान 269 कोटी, तर पांच चालू कॅसिनोंची 45 कोटींची रक्कम करांच्या रुपांत सरकाराक येवपाची आसा. हे कॅसिनो फक्त मांडवींतलेच न्हय, तर राज्यभरांतले. गोंयचो हिशोब काडल्यार रक्कम खंय पावत तें कुबेराक पसून सांगपाक जमचेंना. जुगार तसो आमचे संस्कृतायेचो वांटो अशें म्हणल्यार कोणाच्यो भावना दुखच्यो न्हय. दिवाळे दिसा पयशे लावन इस्पिकांनी खेळपाची प्रथा आसा. आख्खें महाभारत तर जुगाराक लागून घडिल्लें. जुगार हो वायट हें आमकां केन्ना कळटलें?
जुगार हो खीणभर गिरेस्तकाय दाखयता, मात जिणभराची दळडिराची वाट मेकळी करता. नशिबा परस मनशाच्या दुबळेपणाचो तो वेपार म्हणल्यार अतिताय थारची ना. जुगारांत जिखिल्लो पयसो केन्नाच समाधान दिना, पूण हारिल्लो पयसो पुराय कुटुंब उद्ध्वस्त करता. तो खेळपी एकलोच हारना, तर ताचे वांगडा घर, समाज आनी मुल्यांय हारतात. जुगाराक मनोरंजन म्हणप म्हणल्यार म्होंवाचें लेबल लावन वीख विकप. पणजेंतल्या कॅसिनोंचेर दरदिसा कितल्या कोटींचीं भरती आनी सुकती येता, ती ते म्हादयमायेकूच खबर. न्हंयचें नांव बदलून जुगारा कडेन संबंदीत नांव दिल्यार कोणाक वायट दिसचे ना, इतलें थंय कॅसिनोचें प्रस्थ वाडलां. पणजी आयज ‘गॅम्बलर्स ओन सीटी’ जाल्या. काळोख दाटपाक लागलो काय थंंय बोल्सां खुळखुळायत उमेदीचीं ल्हारां येतात. मध्यानरात उलगता तेन्ना मात फक्त हवेंत विरघळिल्ले हय न्हयशे ओले हुंदके कानार पडटात. कॅसिनो कितले जोडटात, तें तांकांच खबर, पूण कर बुडोवप हो समाजीक अन्याय. कारण ताचो फटको निमणो सामान्य भौसाकूच बसता.
कॅसिनों कडल्यान नोंदणी – वर्सुकी शुल्क आनी हेर कर मेळटात. हातूंत 40 ते 107 कोटीं मेरेनची थकबाकी आसा. कर बुडोवप हो गुन्यांव. पूण बरेच कडेन तो गुन्यांव म्हूण न्हय, तर प्रशासनाचो उणाव, त्रुटी म्हूण पळयतात. वेवसायीक आस्थापनाक जीएसटी, आयकर, अबकारी कर, जकात हाचे वांगडाच पालिकेचें भाडें, वीज- उदकाच्या बिलाची थकबाकी आसता. कॅसिनोच न्हय, तर सगलेच संद मेळ्ळी काय कर चुकोवपाक सोदतात. कांय जाण तो बुडयतात, तर थोडे संबंदीत अधिकाऱ्यांक हाता कडेन धरून ‘कुछ खट्टा, कुछ मिठा’, ह्या न्यायान थोडोच कर भरतात. कर बुडप वा थकबाकी हें भौशीक लुकसाण. आमचे कडेन कायदे आसात, पूण ते योग्य पद्दतीन चालीक लागनात. थोड्याक बील, टॅक्साचे थकबाकींत सूट दितात. तो वेळार कर भरप्याचो अपमान. दुसरे वटेन ‘अशी सवलत जाहीर जायसर रावया’, ही मानसिकताय तयार जाता. एक रकमी कर भरपाक लावन सवलत दिवप हो तात्पुरतो उपाय जालो. कारण रोग कायम उरता! खरें म्हणल्यार सरकारान कडक पावलां उखलपाक जाय. परवानो रद्द करप, मालमत्ता जप्त करप, असले उपाय घेवं येतात. पूण ताका राजकी इत्साशक्त जाय. कोण वेळार थकबाकी भरिनात, तांकां उण्यो सवलती दिवंच्यो. करवसुली खातीर अधिकाऱ्याक जापसालदार धररचे. कॅसिनो करोडांनी जोडटात, मागीर ते कर कित्याक भरिनात काय?
करांची थकबाकी मेळत जाल्यार तो पयसो भलायकी, येरादारी, पर्यटन अश्या मळांचेर वापरूंक मेळटलो. कर बुडोवप म्हणल्यार उदरगतीच्या मार्गा वयले फोंडूच!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
