भांगरभूंय | प्रतिनिधी
पणजी : भाजप सारकिल्ल्या भ्रश्ट आनी हुकुमशाय पक्षाक काडपा खातीर सगल्या विरोधी पक्षांनी एकठांय येवप गरजेचें. फोंडें मतदारसंघ सदांच कॉंग्रेसीचो बालेकिल्लो जावन आसा. हाका लागून पोटवेंचणुकेंत हांगा कॉंग्रेसीचोच उमेदवार आसतलो. एकठांय येवपा विशीं आमी सगल्या विरोधी पक्षांच्या आमदारां कडेन उलोवप करतले. भाजप फोंड्यां आनी राज्य कराचें राजकारण करता अशें विरोधी पक्ष फुडारी युरी आलेमाव हांणी सांगलें. मंगळार पणजे ते माध्यमां कडेन उलयले.
आलेमाव हांणी सांगलें, आमचे मदीं कितेंय मतभेद आसल्यार ते बंद दारा भितर उरूंक जाय.
भाजप पसून गोंयांक वाटावपा खातीर सगल्यांनी आपले राजकी मतभेद विसरून एकठांय येवप गरजेचें. हेर राजकीय पक्षांनी गोंयच्या, गोंयकारांच्या बर्या खातीर एकठांय येवचें. जिल्लो पंचायत वेंचणुकेंत आमी बरी कामगिरी केली. मात आमी एकठांय आसले जाल्यार बरो निकाल पळोवपाक मेळपाचो. हांव दोस्तीपूर्ण लढत हे कल्पनेच्याय आड आसा.
चिंबलकारांनी युनिटी मॉला आड ४४ दीस आंदोलन केलें. सरकारान आंदोलन करप्यां मदीं फूट घालपाचो यत्न केल्लो. मात सरकार येसस्वी जावंक ना. होच एकवट राजकी पक्षांनी दाखोवप गरजेचें. फोंड्यां कॉंग्रेस, विरोधी पक्षा आड भाजप अशी वेंचणूक जाल्यार कॉंग्रेसीचें जैत सुरळीत जातलें. कॉंग्रेस पक्ष हे वेंचणुके कडेन गंभीरपणान पळयता. हांगाय भाजप फूट घालून जिखपाचो यत्न करतलें. हाका लागून विरोधकांनी एकठांय येवप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
