भांगरभूंय | प्रतिनिधी
म्हापशें : पेडें, म्हापशेंच्या उड्डाणपुलाच्या बांदकामा खातीर बंद केल्ल्या महामार्गाच्या भागांतल्यान गेल्ल्यान दुचाकीक अपघात जालो. हातूंत राहुल भोसले (थिवी) हो दुचाकी चालक गंभीर जखमी जालो. ताका गोमेकॉंत दाखल केलो.
मध्यराती उपरांत २ वरांचेर हो अपघात घडलो. राहुल भोसले हो तरणाटो गिरीच्यान दुचाकीन करासवाडा वतालो. पेड्यां उड्डाणपुलाचें बांदकाम सुरू आशिल्ले सुवातेर पाविल्ले कडेन, कोणें तरी रस्त्यावेले बॅरिकेड्स कुशीक काडून दवरिल्ल्यान तो दुचाकी घेवन वेगान तसोच मुखार गेलो.
फुडें रस्त्याच्या कामा खातीर सांठोवन दवरिल्ले मातयेचे राशीचेर दुचाकीचो धपको बसलो. हातूंत राहुल भोसले गंभीर जखमी जालो. उपरांत ताका गोमेकॉंत दाखल केलो.
मजगतीं, उड्डाणपुलाचें काम करतना जाय तशी जतनाय घेवंक नाशिल्ल्यान हो अपघात घडिल्ल्याचें थळावे म्हणटात. ही परिस्थिती अशीच उरल्यार हाचे परस व्हड अपघात घडपाची शक्यताय थळाव्यांनी उक्तायल्या. तशेंच गरजेची जतनाय घेवपाची मागणीय थळाव्यांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
