मानसीक लुकसाण करून मेळिल्लें वेवसायीक जैत!

भांगरभूंय | प्रतिनिधी

गुन्यांवकारी वकिलीचें काम, चड करून गंभीर केसींनी, हें काळजाचे उदक करपी काम. एका वकिलाची नामना सुताच्या धाग्यावरी नाजूक आसता; ती फकत ताच्या निमाण्या निकालाचेर थारता. जायत्या वर्सांचें निखळ काम आनी मेळयिल्ल्यो सुटका, एका निकालाक लागून लोक रोखडेच विसरून वतात. लोक आनी वांगडी वकील लेगीत, वकिलाच्या जायत्या जैतां परस एका हारीची चड याद दवरतात. हाका लागून मनांत सदांच एक धुगधुग आसता. ह्या वेवसायांत वकिलाचें मोल ताणें निमाण्या खटल्यांत कशें काम केलां, हाचेरच जोखतात.
ह्या मळार काम करतना सदांच गुन्यांव, हिंसा आनी मनशाचें दूख पळोवन मनाचेर खोल परिणाम जातात. वकील जरी भावनां पसून पयस रावपाचो यत्न करता, तरी खटल्यांच्यो फायली ल्हवू ल्हवू ताच्या मनाचेर घाव घालतात. वकील फकत पुराव्यांचो अभ्यास करीना, तर पिडीत कुटुंबांचे वळवळेय ताका जाणवतात. वेळ वता तसो ताका मानसीक थकवो येता. काम चालू दवरपाक काळीज घट करचें पडटा, पूण हाका लागून खाजगी
जिवितांतली शांतताय आनी खोशी उणी जायत वता.
एक क्रिमिनल वकील चड करून दुबावीत आनी सरकारी सत्ता हांच्या मदल्या संघर्शांत एकलोच झुजता. समाजाक ना आवडपी केसींनी वकिलाचेर टीका जाता. तरी लेगीत, वकिलाक आपलें कर्तव्य प्रामाणिकपणान करचें पडटा. हाका लागून ताका एकाकीपण जाणवता.
वकिलाचो विवेक ताका वाट दाखयता, पूण समाज चड करून ओगी रावता वा ताका दोश दिता.
पयशांचो ताण परिस्थिती आनीक इबाडटा. वकिलीचो वेवसाय चलोवपाक पुस्तकां, ऑफीस भाडें, पगार आनी दिसापट्ट्या खर्चां खातीर खूब पयशे लागतात. तेच बरोबर कुटुंबाच्यो गरजोय वाडत आसतात. वकिलीचें उत्पन्न थारावीक नाशिल्ल्यान सदांच अर्थीक हुस्को आसता. शारिरीक, मानसिक थाकाय आयली तरी काम करचेंच पडटा, कारण संवसार ओडप गरजेचें.
कोर्टांतलें काम केन्नाच सोंपना. केश सोंपली तरी वकिलाचें मन केन्नाच केशींतल्यान मेकळें जायना. रातच्यो लेगीत मनांत वाद- विवाद, युक्तीवाद आनी फुडल्यो सुनावण्यो घोळत आसतात. वकील दुसऱ्यांचेया सुटके खातीर झुजता, पूण स्वताची शांतताय वगडावन बसता. कर्तव्या खातीर ताका आपलो वेळ आनी विसव सोडचो पडटा.
सगल्यांत व्हड लुकसाण ताच्या घरांत पळोवपाक मेळटा. जायते फावटी वकील शारिरीक नदरेन कुटुंबा वांगडा आसलो तरी मनान थंय नासता. ताचीं चिंतनां कोर्टांत आनी फायलींनीच घुस्पल्लीं आसतात. हाचो परिणाम घरच्या नात्यांचेर जाता. आपल्या मोगाच्या मनशांक वेळ दिवंक शकलो ना, हाचें ताका सदांच अपराधीपण (guilt) जाणवता.
वकिलीच्या ह्या कठीण वेवसायांत इतले त्रास सोंसून लेगीत, वकिलांनी
सदांच वज्रा वरीं घट रावपाक जाय, अशी अपेक्षा समाज करता. ताण वा मानसीक त्रासां विशीं उलोवप म्हणल्यार दुबळेपण अशेंय मानतात. वकील आपल्यो भावना लिपोवपाक शिकतात, पूण हाका लागून तांकां पुराय थकवो (burnout) येता. वकिलीच्या वेवसायांतले मानसीक त्रास मान्य करप म्हणल्यार दुबळेंपण न्हय, तर ती ह्या कामाची मानवी बाजू, हें समाजान मतींत घेवचें.

अ‍ॅड. विनायक (मामा) डी. पोरोब
99231 46840