भांगरभूंय | प्रतिनिधी
संसदेचें अर्थसंकल्पी अधिवेशन सध्या चालू आसा. तातूंत तरी विरोधक संयम दाखयतले आनी सरकार त्याच संयमान कामकाज सुरळीत चलोवपाचो यत्न करतलें अशी अपेक्षा आसता. मात ती ह्या वेळार पुराय अपेशी थारल्या. कामकाज आडावप, सभाघरांत गोंदळ घालप, सरकाराचेर तोंडाक येता ते आरोप करप होच जणू अजेंडा घेवन राहुल गांधी हांच्या फुडारपणा खालचो विरोधी पक्ष हे खेपेय मुखार वतना दिसता. लोकसभेचें काम लागीं लागीं पुराय थांबलां आनी संसदीय लोकशाये खातीर हें चित्र निश्चितूच हुस्क्याचें आसा, हें निश्चीत. ‘संविधान बचाव’ चो नारो दित परतून सत्तेर येवपाचें सपन पळोवपी काँग्रेस आनी ताच्या वांगड्यांक प्रत्यक्षांत संसदीय संकेत आनी घटनात्मक शिस्त ते पांयां पोंदां माड्डिटात, ताचें भावन उरिल्लें दिसना.
हे खेपे प्रधानमंत्री नरेंद्र मोदी हांकां राष्ट्रपतीच्या संबोधनाचेर जाल्ले वादविवादाक जाप दिवपा पसून आडावपाक बायलां खासदारांक धाल म्हणून वापर केलो. विरोधी पक्षाचे फुडारी राहुल गांधीन तयार केल्ली ही रणनिती फकत निशेध करपासारकीच न्हय, तर आतां विरोधकां कडेन वेगळें कितेंच करपाची तांक उरूंक ना हेंच ह्या प्रकारांतल्यान दिसलें. राजकी कोडसारपण आसप चूक न्हय; पूण अशी तोकाचें कोडूपण निमाणें देशाक खंय व्हरतलें हाचो गंभीरतायेन विचार काँग्रेस पक्षाक करचो पडटलो. सत्ताधारी पक्षाच्या एका खासदारान काँग्रेसीक सभाघरांत ‘अबोध बाळकाचे’ कैदी जावन रावूं नाकात, असो सल्लो दिले उपरांत राज्यसभेंतले विरोधी पक्ष फुडारी मल्लिकार्जुन खर्गे हांणी प्रधानमंत्री नरेंद्र मोदी हांणीच सगल्या खासदारांक बंधक केल्यात असो आरोप केलो. प्रत्यक्षांत कोण बंधक आसा तें देशाक वेगळें सांगपाची गरज ना. आयज संसद स्वता राजकी कोडूपणाची बंधक जाल्या, अशेंच वास्तव चित्र दिसता.
भारतीय लोकशायेची सगळ्यांत उंचेली संस्था म्हणून संसदेक पळयतात. देशाच्या प्रस्नांचेर निर्भय, खोलायेन आनी जबाबदारपणान चर्चा करप, सरकाराक जापसालदार धरप आनी लोकांचे अपेक्षेक दिशा दाखोवपी निर्णय घेवप ही संसदेची खरी भुमिका. पूण हालींच्या सत्रांचेर नदर मारल्यार ही भुमिका स्थिरपणान दुबळी जायत आसा. हाचें मूळ कारण म्हणल्यार सत्ताधारी पक्ष आनी विरोधी पक्ष हांचे मदीं वाडत वचपी, अती आनी असहिष्णु राजकी कोडूपण. संसदेची कार्यवाही खंडीत जावप ही आतां अपवादात्मक घडणूक उरूंक ना; ती एक नित्याची गजाल जाल्या. घोशणा दिवप, आरोप आनी प्रत्यारोप, फलकबाजी आनी सभापती फुडले मेकळे जागेंत (वेल) वचप हाका लागून गंभीर चर्चा करपाक वेळ उरना जाला. देखून संसद ही धोरण तयार करपाचो मंच न्हय तर राजकी संघर्शाचें झुजा मैदान जावपाक लागल्या.
लोकसभेंत राष्ट्रपतीच्या संबोधनाचेर आभारप्रदर्शक प्रस्तावाचेर भासाभास करतना घडिल्ल्यो घडणुको हाचो जिवो नमुनो. विरोधी पक्षाचे फुडारी राहुल गांधीन आदले लश्करी मुखेली जनरल मनोज मुकुंद नरवणेच्या पुस्तकाचो उल्लेख करून गलवान देगणांतल्या घडणुकांचेर प्रस्न उपस्थित केले. देशाचे सुरक्षे कडेन संबंदीत प्रस्न विचारप हो विरोधकांचो घटनात्मक हक्क; पूण अशा संवेदनशील
प्रस्नांचेर उलोवपाक चड जापसालदारकी, स्पश्टताय आनी संसदीय जागृताय जाय पडटा.
राहुल गांधीचे आरोप सरकारान खरपणान न्हयकारले. पूण फुडें कितें जालें तें आनीकय चिंतेचें आशिल्लें. सभाघरांत गोंदळ जालो, आरोपांचो शिंवर जालो आनी चर्चा अर्दकुटी उरली. प्रधानमंत्र्यान राज्यसभेंत जाप दिली, पूण समाधानकारक संवाद जालो अशें म्हणूंक मेळचेंना. प्रस्न विचारून जाप आयकुचे बदला दोनूय वटांनी आपापल्या राजकी स्थिती रेखांकीत करपाचेर भर दिलो. मुळांतूच आयज संसद चलूंक दिवंक नाशिल्ल्यान सत्ताधारी पक्ष आनी विरोधी पक्ष दोनूय सारकेच जापसालदार आसात. विरोधी पक्ष आडवाटेन वता जाल्यार ताका योग्य मार्ग दाखोवपाची जापसालदारकी सरकाराचेरुच चड आसता. जाप दिवपाची भुमिका समजून घेवपा सारकी आसली तरी सभाघर कार्यरत दवरपाची निमाणी जापसालदारकी सरकाराचेर आसा हें विसरूंक फावना. प्रसंग मात्शें फाटीं सरून लेगीत सरकार खूब कितें साध्य करूंक शकता; पूण राजकी कोडूपण ताचे आड येता अशें दिसता. भोवमत म्हणचे सगळें न्हय. भोवमताच्या आदाराचेर विरोधकां कडेन पुरायपणान दुर्लक्ष करप हें लोकशायेचें बळगें न्हय, तर तिचें दुबळेपण. सध्या
ची परिस्थिती पळयल्यार संसद
लोकांच्या अपेक्षां पासून पयस वता अशी भावना वाडत आसा. चलनवाड, बेकारी, शेतकार प्रस्न, शिक्षण, भलायकी, परराश्ट्र धोरण अशा गंभीर विशयांचेर खोलायेन चर्चा करचे परस संसद राजकी आरोपांच्या धुल्ल्यांत शेणत वचपाक लागल्या. हाचो लोकशाये वयल्या लोकांच्या विस्वासाचेर थेट परिणाम जाता.
लोकशाय फकत वेंचणुकांपुरती मर्यादीत ना; दिसपट्टे संवाद, चर्चा आनी परस्पर आदर हांचे वरवीं ती तिगून उरता. संसदेंत संवादा बदला संघर्श आनी एकमत जावचे बदला अहंकार बळिश्ट थारलो जाल्यार मागीर लोकशायेचीं मुळां दुबळीं जातात. देखूनच आत्मपरिक्षणाची गरज आसा. सत्ताधारी पक्षान आपली जापसालदारकी वळखून विरोधी पक्षाच्या प्रस्नांचेर गंभीरतायेन उपाय काडचो, जाल्यार विरोधकांनीय कार्यवाही थांबोवचे परस चर्चा करून सरकाराक जापसालदार धरपाचो मार्ग आपणावचो. राजकी मतभेद अपरिहार्य आसात; पूण ते सभ्यतायेचे चौकटींत, संसदीय मर्यादेंत व्यक्त करपाक जाय. संसद ही राजकी कोडसाणेची कैदी जाय नासतना राश्ट्रहिता खातीर संवाद, समन्वय आनी सहमतीची सुवात जावंची हीच देशाची अपेक्षा आसा. संसद संघर्शाची न्हय, संवादाची सुवात. हें सगळ्यांनी परत एक फावट मनापसून मान्य करपाचो वेळ आयला.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
