भांगरभूंय | प्रतिनिधी
पणजी : पणजे बाजारांत मानकुराद आंबे आयल्यात. एक मानकुराद आंबो 500 रुपयांक वा 6 हजार रुपयांक एक डझनह्या दरान विकतात. मानकुराद आंबे कांय मेजक्याच वेपाऱ्यां कडेन तेवूय उण्या प्रमाणांत विकपाक आयल्यात. फुडल्या म्हयन्यांत बाजारांत चड प्रमाणांत आंबे येवपाची शक्यताय आसा. ते उपरांतूच आंबो मात्सो सवाय जातलो, अशें वेपाऱ्यांनी सांगलें.
पणजी बाजारांत अजून हापूस आंबे येवंक नात. सोमारा तोतापुरी आंबे 250 रुपयांक कील ह्या दरान विकताले. तोरां 100 रुपयांक 4 ते 5 नग ह्या दरान विकताले. पणसाचे गरे 100 रुपयांक 10 ते 12 ह्या दरान विकताले. म्हस्काच्यो सांगो अजून म्हारग आसात. 100 रुपयांक 5 सांगो मेळटाल्यो. लिंबू 5 रुपयां एक नग विकताले.
सोमारा पणजी बाजारांत हेर भाजयांचे दर फाटल्या सप्तका भशेनूच आशिल्ले. नाल्ल आकारा प्रमाण 30 ते 50 रुपयांक एक मेळटालो. कणग्यो 80 रुपया कील आशिल्ल्यो. ल्हान लसून 200 रुपया जाल्यार व्हड लसूण 500 रुपया कील आशिल्ली. आलें 180 ते 200 रुपया कील आशिल्लें. कांदो आनी बटाटे दरेकी 50 रुपया जाल्यार टमाटां 40 रुपया कील विकताले. मटार, गाजर, भेंडे, ढब्बू मिरसांग 80 रुपया कील आशिल्ली. फ्लावर 50 रुपया नग मेळटालो, जाल्यार कोबी 40 रुपया कील आशिल्लो. वांयगीं 60 त 80 रुपया कील आशिल्लीं.
वालपापडी दर्ज्या प्रमाण 80 ते 120 रुपया कील मेळटाली. तवशीं 80 रुपया, जाल्यार मिरसांग 80 ते 100 रुपया कील आशिल्ली. मेथीची एक जुडी 25 रुपया, पालक, कांद्याची पात दरेकी 15 रुपया जुडी आशिल्ली. शेपू 25 रुपया जाल्यार कोथमीर 20 रुपयांक एक जुडी मेळटाली. फलोत्पादन मंडळाच्या गाड्यांचेर कोंदो 27 रुपया, बटाट 25 रुपया, टमाट 28 रुपया, वालपापडी 60 रुपया, मिरसांग 76 रुपया, भेंडे 57 रुपया, गाजर 25 रुपया जाल्यार कोबी 25 रुपया कील ह्या दरान विकताले. फ्लावर 35 रुपयांक एक नग विकताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
