भांगरभूंय | प्रतिनिधी
मायकल लोबो : हेर प्रकल्प लेगीत लेगीत ताकतिकेन चालीक
भांगरभूंय । प्रतिनिधी
दिवचल : खूब वर्सां सावन आडकून उरिल्ल्या दिवचल बसस्टॅण्डाच्या कामाक गती मेळ्ळ्या. फुडल्या दोन म्हयन्यांत पयल्या पांवड्य वयलें काम पुराय करून पावसा आदीं बसस्टॅण्ड प्रवाशां खातीर उक्तो करतले, अशी म्हायती गोंय साधन सुविधा मंडळाचे अध्यक्ष आमदार मायकल लोबो हांणी दिला.
लोबो हांणी थळावे आमदार डॉ. चंद्रकांत शेट्ये, साधन सुविधा मंडळाचे अधिकारी रोहीत कदम, श्रीपाद कवळेंकार येरादारी अधिकारी संदीप पारोडकार, समीर चोडणकार, डॉ. कौस्तुभ पाटणेकार, पद्माकर मळीक, वल्लभ साळकार तशेंच नगराध्यक्ष विजयकुमार नाटेकार, दिपा पळ, दीपा शिरगांवकार, अनिकेत चणेकार, गुंजन कोरगांवकार, नगरसेवक आनी हेर मानेस्तांचे हाजिरेंत दिवचल बसस्टॅण्डाची पळोवणी केली. ह्या वेळार तांणी बसस्टॅण्डा वांगडाच खूब वर्सां सावन आडकून उरिल्ल्या उजो पालोवपी दळाचे इमारतीची तशेंच सुमार 70 कोटी रुपया खर्च करून उबारतात त्या भोवउद्देशी सरकारी संकुलाच्या कामाचीय पळोवणी करून नियाळ घेतलो.
बसस्टॅण्डाच्या पयल्या पांवड्याचर पुराय वाठार सुसज्ज करतले. दुसऱ्या पांवड्या वयल्या कामा खातीर कांय म्हयने लागतले. मात, पावसा आदीं बसस्टॅणअड प्रवाशां खातीर पुराय तयार करतले. ह्या बसस्टॅण्डा खातीर सुमार 20कोटी रुपया खर्च येतलो. पयल्या माळ्याचेर येरादारी खात्याचें जाल्यारय दुसऱ्या माळ्याचेर कदंबाचें कार्यालय आसतलें. सकयल दुकानां आसतलीं, तशेंच सगल्यो प्रवासी सुविधा आसतल्यो. लोकांची गैरसोय पयस जावची, हे खातीर आमदार डॉ. चंद्रकांत शेट्ये हांणी नेमान फाटपुरवण केल्या, अशें लोबो हांणी सांगलें.
मजगतीं, दिवचल उजो पालोवपी दळाची इमारतीचें काम खूब वर्सां सावन आडकून उरलां. आतां मेरेन तीन खेपे कंत्राटदार बदलिल्ल्यान कामाचेर परिणाम जालो. मात, आतां ह्या कामाक लेगीत गती दिल्या. साधन सुविधा मंडळाच्या पंगडाक ताकतिकेन लक्ष घालून फुडल्या कांय म्हयन्यांत हें काम पुराय करपाचे आदेश दिल्यात, अशें लोबो हांणी सांगलें.
दिवचले 70 कोटी रुपया खर्च करून बांदतात त्या भोवउद्देशी सरकारी संकुलाचें काम गतीन चालू आसा. ह्या प्रकल्पा विशीं लोबो हांणी समाधान उक्तायलें. ह्या संकुलांत सगलीं सरकारी कार्यालयां एकाच पाख्यां खाला येतली. तशेंच व्हड कला भवन, सुसज्ज पार्कींग वेवस्था आनी हेर नागरी सुविधा उपलब्ध करून दितले. कंत्राटदारा वतीन नेटान काम चालू आसा. हो प्रकल्प थारायिल्ल्या वेळांत पुराय करतले, अशी म्हायती आमदार डॉ. चंद्रकांत शेट्ये हांणी दिली. मजगतीं, दिवचल हॉस्पिटलाच्या फाटले वटेन मड्यांकूड बांदपाची येवजण आसा. ते संबंदांत मायकल लोबो आनी डॉ. शेट्ये हांणी अधिकाऱ्यां सयत पळोवणी केली. हे मड्याकुडी खातीर सुमार 15 लाख रुपया खर्च येतलो, अशी म्हायती तांणी दिली. ह्या वेळार तांचे वांगडा नगराध्यक्ष विजयकुमार नाटेकार, नगरसेवक दीपा पळ, दीपा शिरगांवकार तशेंच हेर नगरसेवक आनी थळावे पदाधिकारी उपस्थीत आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
