भांगरभूंय | प्रतिनिधी
मडगाव: घोगळ हावसिंग बोर्डच्या सुन्नी गुलिस्तान मशिदी भायर जाल्ल्या खून प्रकरणा उपरांत जिल्लो प्रशासनान मशीद सील केल्ली. आयज सोमारा मुस्लिम भावांनी मशिदी भायर जमून निदर्शनां केलीं आनी रमजान पयलीं मशीद उक्तें करपाची मागणी केली. हे फाटभूंयेर आमदार आलेक्स रेजिनाल्ड हांणी मंगळारा जिल्लोधिकार्यां वांगडा बसका घेवन हे विशीं निर्णय घेतले, अशें सांगलें.
घोगळ हाउसिंग बोर्डच्या सुन्नी गुलिस्तान मशिदीचे भायर ३० जानेवारीक वेवस्थापन समितीचे उपाध्यक्ष अली खान हांचो खून जाल्लो. मशिदीचेर ताबो आनी निधी विशींच्या वादांतल्यान ही घडणूक घडिल्ली. ह्या प्रकरणांत आतां मेरेन मुखेल सुत्रधार अक्रम खान आनी सुर्याची पुरवण करपी साहिला सयत वट्ट आठ जाणांक फातोर्डा पुलिसांनी अटक केल्या. हे घडणुके उपरांत मशिदीच्या वाठारांत व्हड पुलीस बंदोबस्त तैनात केल्लो. खुनाचे घडणुकेक लागून पुलिसांच्या अहवाला प्रमाण दक्षीण गोंय जिल्लोधिकार्यांच्या आदेशान मशिदीचो वाठार सील केलो. परिणामी, फाटल्या शुक्राराय नमाज पठणा खातीरय मशीद बंद आशिल्लें.
ह्या कारणाक लागून सोमारा मुस्लिम भावांनी मशिदी लागसार गर्दी केल्ली. ’मशीद हे ईश्वराचें घर. ते चड काळ बंद दवरप सुकीचें. गुन्यांवकारांचेर खर कारवाय जावची. मात सामान्य भाविकांक नमाज पठणा पसून पयस दवरचें न्हय.’ अशी भावना हाजीर आशिल्ल्यांनी उक्तायली. सुन्नी गुलिस्तान मशिदीचें सील उगडून नमाज पठणास परवानगी द्यावी, अशी मागणी यावेळी केली.
मजगतीं, कायदो आनी सुवेवस्था इबाडची न्हय म्हणून उपजिल्लोधिकार्यांनी ही मशीद सील केल्ल्यान ताण निवळ्ळ्या बगर ही बंदी कायम उरपाचे संकेत प्रशासना कडल्यान मेळटात.
मशिदी भायर गर्दी वाडिल्ल्यान फातोर्डा पुलिसांनी आनीक पंगड मागोवन घेतिल्लो. कुडतरचे आमदार आलेक्स रेजिनाल्ड हांणी बेगोबेग घडणुके सुवातेर वचून आंदोलकां कडेन चर्चा केली. धर्मीक स्थळ बंद उरपाक जायना, मात कायदो-सुवेवस्थेचो प्रस्नूय म्हत्वाचो. शांतता राखून आमी हाचेर योग्य तोडगो काडचो, अशें आस्वासन तांणी दिलें. तशेंच मशिदीर योग्य व्यक्तींची नियुक्ती जावची आनी ह्या विशयावेल्यान अदीक बोवाळ जावचो न्हय म्हणून मंत्री दिगंबर कामत आनी आमदार विजय सरदेसाय हांचे कडेनूय चर्चा करतले अशें तांणी सांगलें. हे समस्येचेर तोडगो काडपा खातीर मंगळारा सांजेवेळार एका शिश्टमंडळा सयत दक्षीण गोंय जिल्लोधिकार्यांची भेट घेवन बसका आयोजीत करतले, अशेंय रेजिनाल्ड हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
