भांगरभूंय | प्रतिनिधी
पणजीः धाव्वी नापास जाल्ल्या भुरग्यांक धावेचें शिक्षण पुराय करपा खातीर भायल्या परिक्षा केंद्रांनी २५ हजार मोडपाची आतां गरज पडची ना. हे खातीर राज्यांतल्या बाराय म्हालांनी दरेकी एक शाळा संलग्न करपाचे निर्देश शालांत मंडळाक दिल्या. चडांत चड पांच हजार भरुन धाव्वेचे परिक्षेत परत पास जावप आतां शक्य जातलें, अशी म्हायती मुख्यमंत्री डॉ. प्रमोद सावंत हांणी दिली.
गोंय शालांत मंडळाक सोमारा ५० वर्सां पुराय जालीं. पर्वरे जाल्ले गोंय शालांत मंडळाच्या भांगराळ्या महोत्सवा निमतान मुख्यमंत्री उलयताले. ह्या वेळार पर्यटन मंत्री आनी थळावे आमदार रोहन खंवटे, मंडळाचे वांगडी तशेंच वास्कोचे आमदार दाजी साळकार, मंडळाचे चेअरमन भागीरथ शेट्ये आनी शिक्षण संचालनालयाचे संचालक शैलेश झिंगडे हजर आशिल्ले.
गोंय मनीस बळ उदरगत महामंडळांतले आठवी पास जाल्ले कर्मचारी आसात तांकां धावेचें शिक्षण पुराय करपाची संद आमी दिल्या. सुरक्षा रक्षक पदावेल्यान ते एमटीएस पदा मेेरेन वयचे ह्या हेतान तांचे धाव्वेच्या शिक्षणाचो खर्च हें सरकार करता, अशें मुख्यमंत्र्यान म्हणलें.
मात शालांत मंडळ सोडून भायल्या परिक्षा केंद्रान धाव्वेची परिक्षा दितले आसत जाल्यार तांकां २५ हजार मेरेन पयशे मोडचे पडटात. कांय केंद्रां ४० हजार मेरेन शुल्क मागतात. देखून ह्या विद्यार्थ्यांक थाकाय दिवपा खातीर दरेक म्हालांतल्यो एक शाळा सलग्न करपाचे निर्देश शालांत मंडळाक दितले. फक्त शिकोवपाचें शुल्क रु. १ हजार आनी पुस्तकांचें शुल्क रु. ५ हजार धरून वट्ट स हजार भरून परिक्षा परत दिवपाक मेळटली, अशी म्हायती मुख्यमंत्र्यान दिली.
हे विशीं पयली तरतुद आसली. मात हे प्रक्रीयेक आडमेळीं खूब येतलीं. आतां ही प्रक्रीया सुटसुटीत केल्या. एकय भुरगो धाव्वी नापास उरचो न्हय असो निश्चेव सरकारान केल्ल्याचें मुख्यमंत्र्यान सांगलें.
सद्या जे भुरगे आठवी पास आसात तांकां २ वर्सां आयटीआय प्रशिक्षण दिवन आमी धाव्वी पास प्रमाणपत्र दितात आनी जे धाव्वी पास आसात तांकांय २ वर्सां आयटीआय प्रशिक्षण दिवन १२वी पास प्रमाणपत्र दिता. तांचे खातीर भाशेचो पेपर लेगीत काडून उडयला, अशें मुख्यमंत्र्यान म्हणलें.
शिक्षकांनी भुरग्यांचो टेलंट वळखपाक जाय. तांणी पद्वी घेवन डॉक्टर, इंजिनयर जावपाची गरज ना. तांचे टेलंट वळखून तांची कुशळटाय वाडोवची आनी फुडलो मार्ग दाखवचो. हे भुरगे आपलें कॅरीअर स्वता थारयतले. हें काम पालकाकडे जावपाक शकना. देखून शिक्षकांनी ही गजाल सक्तिन करची, असो उलो मुख्यमंत्र्यान मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
