भांगरभूंय | प्रतिनिधी
करियर कार्यावळीक लागून फोन येवप हें म्हाका आतां तशें नवें न्हय. असोच एक फोन आयलो. करियर कार्यावळ करपा संबंदी तो फोन करपी आसले तुयें वाठारांतले. म्हाका पयलीं दिसले, शिक्षक आसतले. पूण कार्यावळ जाले उपरांत तांणी आपूण शिक्षक न्हय हें स्पश्ट केलें. इतलेंच न्हय, तर आपूण बँकेची लेखी परीक्षा पास जाल्लो, पूण टायपिंग परिक्षेंत मार खालो, अशेंय सांगलें. हाचें एक कारण मार्गदर्शन ना म्हूण हांव शेणलों, हें सांगपाक तो फाटीं सरलो ना. फक्त सातवी पास जाल्लो हो मनीस जावन आसा तुळशिदास राऊत. फुडें गोवा अॅण्टीबायोटिक्सांत रुजू जालो आनी भायल्यान शिक्षण घेवन ताणें पदवी घेतली. पर्सेच वेवस्थापक म्हूण तो निवृत्त जालो. ताका नाटकाचीय आवड. दिग्दर्शन करताले डाॅ. विजय थळी. गणपती वाणी, एक शून्य बाजीराव, महानिर्वाण सारकीं खडेगांठ नाटकां ताणें केलीं. इतलेंच न्हय, तर अभिनया खातीर जायतीं इनामां मेळयलीं. तुयें पंचायतीचो वांगडो, उपसरपंच जालो. त्याच वेळार तो समाजकार्यांतूय केलो. आपल्याक जें मार्गदर्शन मेळूंक ना, तें भुरग्यांक मेळचें अशें ताका दिसता. आपले नाटकाचे गूण भुरग्यां मदीं येवचे, अशेंय तो म्हणटा. पूण ताचें व्हडलें काम म्हणल्यार तुयें पंचायतीन वतीन ताणें पयलेच खएप करियर कार्यावळ दवरली. खास विद्यार्थ्यां खातीर.
हो एक इतिहासीक खीण. हें ताका खबर आसत, नासत, पूण एखादी पंचायत करियरा सारकी कार्यावळ विद्यार्थ्यां खातीर दवरता हे अजापूच. पंचायत बालसभा दवरता हें आयकून जाणां आसलों, पूण उत्तर गोंयांत तरी पयलेच खेप हें घडलां. हेर पंचायतींनीय असल्यो करियराच्यो कार्यालळी दवरपाक जाय. तर म्हत्वाची गजाल सांगपाची म्हणल्यार मार्गदर्शन हें फाव ते पिरायेचेर मेळपाक जाय. आठवी यत्तेंत आसतना तें मेळचें. आयज तंत्रज्ञानाचें युग आसा. तरीय विद्यार्थ्यांक करियराचे पर्याय खंय सोदपाचे, कोणाक विचारपाचें तें कळना. धावी जाली काय 90 टक्के भुरगे इश्टां वांगडा इकरावेंत प्रवेश घेतात. जांकां मार्गदर्शन नासता, ते तर बारावेक बरे गुण मेळून पसून मागीर भरकटात.
हालींच आमी तोर्शेंचे सरकारी शाळेंत कार्यावळई निमतान गेल्ले. ते शाळेचे जापसालदारकी उमदे नाट्यलेखक नरेंद्र नायक सांबाळटात. तशेंच हणखणें शाळेचीय जबाबदारी तांचे कडेन आसात. तरीय ते करियर कार्यावळींक म्हत्व दितात. शाळेंत जर कार्यावळ जाली जाल्यार विद्यार्थी येतले अशें ते सांगतात. पणजे पुस्तक महोत्सव जालो, तातूंत श्री. नायक हांणी आपल्या विद्यार्थ्यांक व्हेल्ले. सरकारान तशें पत्रक काडिल्लें. काडूंक नाशिल्लें जाल्यारुय हांव तांकां घेवन वचपाचो अशें ते सांगतात. वाचना सारक्या उपक्रमाचें म्हत्व विद्यार्थ्यांक सांगतना वाचनालयाचो वापर विद्यार्थ्यांनी कसो करचो, हें ते सदांच सांगतात.
दिसाळ्यांचें म्हत्व सांगतना ते म्हणटात, दरेकल्यान दिसाळें हें वाचपाकूच जाय. दुसरे दीस दिसाळें भायर उडयतना, तुमका आवडटा त्या विशयाचीं कात्रणां काडून दवरपाक जाय. आतां संगणकाचेरुय तीं दवरपाक मेळटात. मोबायल फोनाचें वेसन, ड्रग्साचें संकश्ट, म्हायतीपूर्ण लेख, आंकडेवारी बी कापून दवरची. तिचो फुडाराका उपेग जाता. दिसाळें वाचिल्ल्यान मोबायल फोन वापरप कमी जाता. भलायकी इबाडना. विद्यार्थी दुसऱ्या उपक्रमांनी व्यस्त उरता. वेळ लेगीत बरो पासार जाता. ही कात्रणां उपरांत करियर वेंचून काडपाकूय बऱ्याक पडूं येतात.
वाचन म्हत्वाचें
पांच दिसांच्या पुस्तक महोत्सवांत देड लाखां वयर लोक आयल्यात, अशी म्हायती मेळ्ळ्या. पुस्तकांय बरींच खपल्यांत. तुमचीं पावलांय पुस्तक महोत्सवाक लागल्या आसतलीं. वाचन कितलें म्हत्वाचें तें हांवें सांगपाची गरज ना. भांगरभूंय दिसाळ्यान ताचेर लेख, अग्रलेखूय प्रसिद्ध केले. असले महोत्सव गोंयच्या संस्थांनी आयोजीत करपाक जाय. नॅशनल बूक स्ट्रट, लोकमान्य सांस्कृतीक संघ, गोंय सरकार हांकां हो महोत्सव आयोजीत केल्ले खातीर परबीं.
डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
