भांगरभूंय | प्रतिनिधी
अधिसुचोवणी काडली, गोंयकारांक थाकाय
पणजी : राज्यांतल्या टपाल कार्यालयांतल्या ग्रामीण डाक सेवकां खातीर कोंकणीचें ज्ञान सक्तीचें केलां. हे विशींची अधिसुचवणी सरकारान जारी केल्या. ह्या निर्णयाक लागून ग्रामीण डाक सेवक पदां खातीर अर्ज करपाक इत्सूक आशिल्ल्या गोंयकारां सयत टपाल सेवेचेर निंबून आशिल्ले जनतेकूय थाकाय मेळटली.
ग्रामीण डाक सेवक पदां खातीर अर्ज करप्यांनी धावेंत कोंकणी वा मराठी विशय घेवन परीक्षा पास जावप गरजेचें. मराठी विशय घेवन धावी पास जावपी उमेदवारांक कोंकणीचेर प्रभुत्व आसचेंच पडटलें. धावेंत कोंकणी विशय नासल्यार कोंकणी भाशेच्या ज्ञाना विशीं गोंय कोंकणी अकादेमी वा सरकारान अधिकृत केल्ले संस्थे कडल्यान प्रमाणपत्र सादर करप गरजेचें.
गोंयचें टपाल खातें सिंधुदुर्ग सर्कलाचे कक्षेंत येता. जायते फावटीं गोंयांत हेर राज्यांतल्या पोस्टमनांची (ग्रामीण डाक सेवक) बदली जाता. तांकां कोंकणी येनाशिल्ल्यान घराघरांनी पत्र पावोवपाक आडमेळीं येतात. पोस्टमन गोंयचे आसचे अशी मागणी लोकां कडल्यानूय जाताली. गोंयच्या पोस्टमनांक कोंकणी भास खबर आसची, हे खातीर आतां भरतींत कोंकणी सक्तीची केल्या.
हे विशीं राज्य सरकारान केंद्र सरकाराक पत्र धाडिल्लें. तशेंच मुख्यमंत्री डॉ. प्रमोद सावंत हांणी केंद्रीय दळवळण मंत्र्यांकडेनूय हे विशीं चर्चा केली. टपाल खात्यान गोंयां खातीर भरती नेमांनी बदल केले उपरांत आतां राज्य सरकारान अधिसुचवणी जारी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
