भांगरभूंय | प्रतिनिधी
पणजी : सांताक्रूझ पंचायतीचे ग्रामसभेंत आयज दुर्दैवी आनी काळजाक पीळ घालपा सारकी घडणूक घडली. हे सभेंत आपलें म्हणणें मांडपा खातीर उबे राविल्ले ७० वर्सां पिरायेचे ज्येश्ठ नागरीक ओलावियो फर्नांडीस हांकां काळजाच्या आताकान मरण आयलें. हे घडणुकेक लागून पुराय सांताक्रूझ वाठारांत दुख्खाचें वातावरण पातळ्ळें.
नेमकी घडणूक कितें?
सांताक्रूझ ग्रामसभा सुरू आसतना ओलावियो फर्नांडीस हाजीर आशिल्ले. सभेचे कामकाज सुरू आसतना फ्लॅट दिवपाच्या शुल्का विशीं तांकां दुबाव आशिल्लो तो विचारपाक ते आपले उबे रावले. मात प्रस्न विचारचे पयलींच तांच्या जिवाक बरे दिसना जालें. ते थंयच कोसळ्ळे. उबे आशिल्ले कडेन जमनीर कोसळिल्ल्यान सभाघरांत बोवाळ जालो. हांगा हाजीर आशिल्ल्या ग्रामस्थांनी आनी पंचायत वांगड्यांनी तांकां मजत करपाचो यत्न केलो.
उपस्थितांनी रोखडोच १०८ ऍम्बुलन्सीक फोन केलो. मात थळाव्यांनी दिल्ले म्हायती प्रमाण, ऍम्बुलन्स वेळार घडणुके सुवाते पावूंक ना. परिस्थितीची खरसाण वळखून आनी वेळ वगडाय नासतना थळाव्यांनी फर्नांडीस हांकां खाजगी वाहनान जीएमसींत व्हेले. मात थंय पावचे पयलींच तांकां मरण आयिल्लें. दोतोरांनी तांकां तपासून मरण आयिल्ल्याचें सांगलें.
सांताक्रूझचे एक सुजाण नागरीक म्हणून ओलावियो फर्नांडीस हांची वळख आसली. ते कृशी खात्यांतले निवृत्त कर्मचारी. गांवांतल्या प्रस्ना विशीं ते सदांच जागृत आसताले. अशे तरेन लोकशायेचे माचयेर आपल्या हक्काचो प्रस्न मांडटना तांकां मरण आयिल्ल्यान सगल्याक दुख्ख पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
