भांगरभूंय | प्रतिनिधी
पणजी: २०२१ वर्सा अंगणवाडी शिक्षिकांनी आल्तिन्हो-पणजेच्या मुख्यमंत्री रावपी घरा सामकार केल्ल्या आंदोलन प्रकरणांत न्यायालयान सगल्या दुबावितांक निर्दोश मुक्त केले. ह्या प्रकरणांत संबंदीत अधिकार्याचो कसलेच तरेचो स्वतंत्र पुरावो उपलब्ध ना. तशेंच एका पुलीस अधिकार्याच्या हाताक घांस मारिल्ल्याचे जखमेचो वैजकी अहवाल सादर करूंक ना, अशें निरीक्षण न्यायालयान नोंद केलें. मेेरशेच्या पयलो वर्ग न्यायाधीश मनीषा पारकर उर्फ नार्वेंकार हांणी हो निकाल दिलो.
नेमकें प्रकरण कितें?
पणजी पुलिसांनी दिल्ले म्हायती प्रमाण, २९ डिसेंबर २०२१ दिसा दनपरां २ ते सांजेवेळार ८:३० वरां मजगतीं अंगणवाडी शिक्षिकांनी आपल्या आडकून उरिल्ल्या मागण्यां खातीर मुख्यमंत्री डॉ. प्रमोद सावंत हांच्या घरा सामकार आंदोलन केलें. ह्या वेळार जना भंडारी, वरद म्हार्दोळकार, साईश आरोसकार, व्यास चोडणकार, दुर्गादास कामत, महेश म्हांबरे, उद्देश नाईक देसाय, रुनल केरकार, हृदयनाथ शिरोडकार, विकास भगत हांचे सयत ५०० ते ६०० अंगणवाडी शिक्षिकांनी बेकायदेशीर सभा घेतिल्ल्याचो आनी परवानगे बगर निदर्शनां करून पुलिसांच्या कामांत आडमेळीं हाडपाचो आरोप केल्लो.
ह्या प्रकरणांत दुबावितांचे वतीन ज्येश्ठ वकील कार्लुस फेरेरा हांणी बाजू मांडली. पुलिसांनी सादर केल्ली साक्ष ही एकाच सायक्लोस्टायलची आशिल्ल्यान, तातूंत कार्यकारी दंडाधिकारी, उपविभागीय पुलीस अधिकारी, बायलां आनी बाल विकास संचालक वा समाज कल्याण खात्याच्या खंयच्याय स्वतंत्र अधिकार्याची साक्ष नोंद करूंक ना, असो युक्तिवाद फेरेरा हांणी केलो.
सगल्यांत म्हत्वाचें म्हळ्यार, एका आंदोलकान पुलिसाक घांस मारिल्ल्याचो आरोप केल्लो, मात हे विशीं खंयचोय वैजकी अहवाल न्यायालयांत सादर जावंक ना. तशेंच दुबावितांनी आंदोलनकर्त्या शिक्षिकांक हिंसक कृत्या खातीर प्रवृत्त केल्ल्याचो कसलोच पुरावो पुलिसांक दिवपाक जावपाक जावंक ना. न्यायालयान दोनूय वटेनचो युक्तीवाद आयकून घेतले उपरांत पुराव्यांच्या उणावाक लागून सगल्या दुबावितांक मुक्त केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
