भांगरभूंय | प्रतिनिधी
भांगरभूंय । प्रतिनिधी
म्हापशेंः कोरोना तेपार लोकांक रेशनकार्डार दिवपाक हाडिल्ली तोरची दाळ, साकर आनी वाटाणे पिड्ड्यार जावपाक आदले नागरी पुरवण मंत्री गोविंद गावडेच जापसालदार आशिल्ल्यान तांकां मंत्रिमंडळांतल्यान काडून उडोवपाची मागणी काँग्रेस पक्षाचो म्हणयारो संजय बर्डे हांणी शुक्रारा म्हापशें हांगा घेतिल्ले एके पत्रकार परिशदेंत केल्या. तांच्या वांगडा पक्षाचो म्हापशें गटाध्यक्ष शशांक नार्वेकार, सितेश मोरे आनी प्रशांत जाधव आशिल्ले.
लोकांक दिवपा खातीर जिनस हाडून ते पिड्ड्यार करप हो एके तरेचो घोटाळो आसा. आमी ताची पुराय म्हायती एकठांय करतात. भाजपान जें कितें चलयलां तें आमी रोखडेंच लोकां सामकार हाडटले. गावडे हांका मंत्रिमंडळांतल्या काडून तांचेर फौजदारी गुन्यांव नोंद करपाक जाय. सरकार आपली चूक मानून घेनास्तना नागरी पुरवण खात्यांतल्या कांय अधिकाऱ्यांक बळीचो बोकडो करपाक सोदता असो आरोप तांणी केला.
कोरोनाच्या पयल्या लॉकडावना वेळार सरकारान लोकांची फटवणूक केली. केंद्रा कडल्यान राज्यांक धान्य पुरवण करपा खातीर अर्थीक पॅकेज मेळ्ळें. तातूंतल्या तुरदाळ आनी साकर हाडिल्ली. लोकांक ती दिनास्तना ती पिड्ड्यार करपी ह्या सरकाराक कसल्योच संवेदना नात अशें बर्डे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
