भारताची जैतान सुरवात

भांगरभूंय | प्रतिनिधी

संवसारीक टी-20 सर्तीचे तिसरे मॅचींत येजमान भारतान अमेरिका पंगडाक 29 धांवड्यांनी हारायलो. मुखेली सूर्यकुमार यादवान कठीण परिस्थितींत केल्ली बॅटींग आनी उपरांत बॉलरांनी केल्ले शिस्तबद्ध कामगिरीच्या नेटार भारतान अमेरिकेक आडायलो.

भारतान दिल्ले 162 धांवड्यांचे मोखीचो फाटलाव करतना अमेरिका पंगडाक 8 विकेटी व्हगडावन 132 धांवड्यो करप शक्य जाल्यो. ताची सुरवात बाबत जाली. मोहम्मद सिराजान सुरवातीकूच धपके दिल्ल्यान अमेरिकेची अवस्था 3 बाद 13 अशी जाल्ली. ते उपरांत मिलिंद कुमार (34) आनी संजय कृष्णमूर्ती (37) हांणी डाव सांबाळपाचो यत्न केलो. शुभम रांजणेन 22 बॉलांनी 37 धांवड्यांची खेळी करून जैताची आस्त कायम दवरली. पूण, भारताच्या बॉलरांनी पुनरागमन करीत अमेरिका पंगडाक 8 बाद 132चेर आडायलो.

ते आदीं मुखेली सूर्यकुमार यादवाच्या नाबाद 84 धांवड्यांचे आक्रमक बॅटिंगे नेटार भारतान निर्धारीत 20 ओव्हरींनी 9 विकेटी व्हगडावन 161 धांवड्यो केल्यो. एका वेळार संकश्टांत सांपडिल्ल्या भारताक सूर्यकुमार यादवान आपले कल्पक बॅटिंगेन सांबाळ्ळो.

​अमेरिका पंगडान टॉस जिखून भारताक पयली बॅटींग करपाचें आमंत्रण दिलें. भारताची सुरवात निर्शेणी हाडपी जाली. ओपनर अभिषेक शर्मा शुन्याचेर बाद जालो. ते उपरांत तिलक वर्मा (25) आनी इशान किशन (20) हांणी 37 धांवड्यांची भागिदारी करून डाव सांबाळपाचो यत्न केलो.

सवे ओव्हरींत अमेरिकेच्या शेडली वान शाल्कविकान मॅच घुंवडायली. ताणें एकेच ओव्हरींत तीन विकेटी घेवन भारताची अवस्था बिकट केली. इशान किशन, तिलक वर्मा आनी शिवम दुबे (0) फाटोफाट बाद जाल्ल्यान भारत 6 बाद 77 असो संकश्टांत सांपडिल्लो. हार्दिक पांड्या फक्त 5 धांवड्यो करून तंबूंत परतलो.

मुखेली सूर्याचा ‘वन मॅन शो’

​पंगडाक सांबाळपाची सगली जापसालदारकी मुखेली सूर्यकुमार यादवाच्या भुजांचेर आयली. सूर्यान मुखेल्याक सोबा सारकें प्रदर्शन केलें. चाणें 49 बॉलांनी 10 चवके आनी चार सक्यांचे मजतीन नाबाद 84 धांवड्यांची आक्रमक बॅटींग करून भारताक संकश्टांतल्यान भायर काडलो. ताका अक्षर पटेलान (14) मोलादीक साथ दीत सातवे विकेटी खातीर 41 धांवड्यांची भागिदारी केली.

अखेरेच्या ओव्हरींनी एके वटेन परतून विकेटी पडपाक चालू जाल्यो आसल्यो तरी सूर्यान एक बाजू सांबाळून धरीत भारताक 161 मेरेन पावयलो.