भांगरभूंय | प्रतिनिधी
म्हापशें : कासारवाडो खोर्ले गटाराच्या बांदकामा खातीर खणटना एका घराची राखणे वणत कोसळून एका कामगाराक मरण आयलें, जाल्यार दुसरो गंभीर जखमी जालो. म्हापशें पालिका प्रभाग 18 त गटार पुनर्बांदणीचें काम चालू आसतना ही दुर्घटणा घडली.
हे दुर्घटणेंत तोजाम्मेल हक उर्फ राजू (38. रा. मूळ अस्तंत बंगाल) हाका मरण आयलें, जाल्यार विशाल सरू (21. रा. मूळ अस्तंत बंगाल) हो जखमी जाला. ताचेर जिल्हो हॉस्पिटलांत उपचार चालू आसात. मरण आयिल्लो आनी जखमी हो दोगूय कामगार करासवाडो म्हापश्यां बिराडाक रावताले.
ही घडणूक शेनवारा 7 फेब्रुवारीक दनपारां 12.30 वरांच्या सुमाराक घडली. कासारवाडो खोर्ले भितरल्या रस्त्याचे कुशीक आशिल्ल्या गटाराचें नव्यान बांदकाम करचे खातीर दोनूय कामगार खणटाले. त्या वेळार घराची राखणे वणत दोगांचेरूय कोसळ्ळी आनी ताचे पोंदां दोगूय चिड्डले. ही सुमार देड मिटराची राखणे वणत आशिल्ली.
आंगाचेर राखणे वणत कोसळिल्ल्यान जखमी जाल्ल्या कामगारांक पयलीं म्हापशें जिल्हो हॉस्पिटलांत उपचारा खातीर दाखल केले. थंयच्यान गंभीर जखमी राजू हाका जीएमसींत धाडलो. मात थंय उपचार चालू आसतना ताका मरण आयलें. घडणुकेची म्हायती मेळटाच म्हापशें पुलिसांनी घडणुकेचे सुवातेर वचून पंचनामो केलो. ह्या प्रकरणांत फुडलो तपास पुलीस उपनिरिक्षक बाबलो परब करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
