बाबा आमटे

भांगरभूंय | प्रतिनिधी

भावंडांनो,
तुमचीं जाण्टेलीं, तशेंच आदरणीय शिक्षक तुमकां बऱ्यो देखी दितना सांगतात न्हय, सदांच दुसऱ्यां कडेन बरीं वागात, दुसऱ्यांक मदत करात, दीन दुबळ्यांची सेवा करात. तुमच्यांतले कांय जाण ते सांगणे वेळार ’आं’ म्हणटात खरे, पुणून मागीर त्यो गजाली, ती सांगणी विसरतात. तुमच्या अभ्यासाक लागून घरांतल्या कामाक लागून तें विसरप साहजीक घडटा. पुणून गरजेवेळार तुमी दुसऱ्यांक पावतात हेंय हांव जाणां. भावंडांनो, तशींच गरजे वेळार दुसऱ्यांक मदत करात हां…
भावंडांनो, हे गजालीची मुजरत याद जाली ती फाल्यांच्या दिसा खातीर… फाल्यां 9 फ्रेब्रुवारी. हो दीस म्हत्वाचो थारला एका वेगळ्याच कारणा खातीर. सांगतां… भावंडांनो, फाल्यां 9 फेब्रुवारी म्हळ्यार रामन मेगसेसे, युनायटेड नेशन्स, रायट लायव्हलीहूड, पद्मश्री, पद्मभूषण अशे तरेचे राष्ट्रीय आनी आंतरराष्ट्रीय पुरस्कारांनी भोवमानीत जाल्ले मुरलीधर देवीदास आमटे हांची फाल्यां पुण्यतीथ. सगळे तांकां बाबा आमटे म्हूण वळखतात. समाजीक, कुटुंबीक उपेक्षा, सोसूंक जायना अश्यो वेदना आनी कुश्टरोग्यांक आपलेच मानून श्रमाचो मंत्र तांकां दिवन आत्मनिर्भर करपी बाबा आमटे हांचें समाजा खातीर व्हड योगदान आसा. तरणाटेपणांत, सानेगुरुजी, विनोबा भावे, संत तुकडोची म्हाराज हांच्या विचारांनी भारावन वचून गांवांतल्या दीन दलितांक न्याय मेळोवन दिवपाचें कार्य तांणी केलां. भावंडांनो, तांची याद काडून तांकां नमन करूया.
भावंडांनो, आमच्या देशांत कितल्याशाच म्हान व्यक्तींनी जल्म घेतलो आनी लोकां खातीर आपली जीण ओपली. अशे यादींत सरोजिनी नायडू हांचें नांव येता. 13 फेब्रुवारीक तांची जयंती.
अठराव्या, एकोणिसाव्या शेंकड्यांत चलयो, बायलांच्या वांट्याक बंदिस्त जीण आयिल्ली. तांकां समाजांत मानाची सुवात नाशिल्ली. तांच्या वांट्याक फकत घर सांबाळप इतलेंच आशिल्लें. घरा भायर तांकां कसलीच मेकळीक नाशिल्ली. पुणून “कोंब्याक धांपून दवरलो म्हूण सकाळ उजवाडावपाची थांबता?” अशी एक जाण्टेल्यांची म्हण आसा, ती तुमी आयकल्या न्हय? तशेंच जालें. हळू हळू चलयां बायलांचे मेकळिके खातीर जायते फुडारी कश्ट घेयत रावले. कारण तांचे उदरगती बगर देशाचे उदरगतीक दुसरो मार्ग नाशिल्लो. परक्यांचे सत्ते खाला, चेंपणा खाला, अन्याय अत्याचारा खाला चेंपून घुस्मटत उरिल्ल्या चलयांक, बायलांक हळू हळू शिक्षण मेळपाक लागलें. समाजा प्रती आपले लागणुकेक पाळो दिवंक लागली. ती सरकारा आड इतलीं वावुरलीं. तांच्या वावरांत, देशसेवेन ती इतिहासांत अज्रंवर उरलीं. जिवाची पर्वा करिनासतना ब्रिटिशां आड वावुरपी बायलांमदीं सरोजिनी नायडू हांची देशसेवा, राष्ट्रनिश्ठा दरेकल्याच्या यादींत उरल्या.
आपल्या जळजळीत भाशणांनी ब्रिटिशांचे जुलमी राजवटीचेर घालो घालपी सरोजिनी नायडू हांणी देशांत पयल्यो महिला राज्यपाल जावपाचो मान मेळयलो. 13 फेब्रुवारीक तांचे जयंती निमतान देश तांची याद काडटा.
उल्हासभाई