भांगरभूंय | प्रतिनिधी
प्रियोळ गांवचो शेतकार दत्ता नायक, हांची वळख माटोळी कलाकार म्हूण आयज गोंयभर जाल्या. ते आपले भुंयेर कश्टांचें पीक काडपी, रातदीस वावुरपी अशे एक प्रामाणीक शेतकार. मिरयाभाट प्रियोळ हांगां तांचें शेत आसा. तांच्या ह्या शेताच्या वावरांत तांकां तांच्या घरच्या अस्तुऱ्यांचो हातभार लाबता. तर अश्या ह्या शेतकामत्यान शालेय पांवड्यावयल्या विद्यार्थ्याक आस्पावन घेवन शिक्षक-शेतकार हाचो सांगोड घालून एक वेगळी देख दिली. आयचें शिक्षण हें वर्गकुडी भायर सरूनूय विद्यार्थी घेवपाक लागल्यात. दत्ता नायक हांणी प्रत्यक्ष अणभवांतल्यान शेती कशी करप तशेंच शेती करपाची पद्दत कशी आसता हाचे विशीचे प्रयोगशील अशें तरेचे शिक्षण विद्यार्थ्यांक दिलें.
विद्यार्थ्यांनी तांच्या शिक्षकां वांगडा चिखलांत पांय बुडोवन मातयेंत हात पाय लोळोवन रोप लायलें, तशेंच आनंदान शेतांतली हेर कामांय केलीं. हातूंत डॉ. के. बी. हेडगेवार विद्यालय कुजिरा, डॉ. के. बी. हेडगेवार उच्च माध्यमिक विद्यालय कुट्टी फोंड्यां तशेंच प्रियोळांतल्या शिक्षा सदन विद्यालय आनी स्वस्तिक विद्यालय ह्या विद्यालयांतल्या विद्यार्थ्यांनी आनी शिक्षकांनी शेतकार दत्ता नायक हांच्या शिकवणे खालां शेतकाम करपांत वांटो घेतलो. विद्यार्थ्यांक शेतकारान दिल्लो हो प्रत्यक्ष अणभवाचो धडो खूब मानवलो. भुरग्यांक मातये कडेन आनी सैमा कडेन लागीं हाडपाचो हो शेतकारालो यत्न तोखणाय करपा सारकोच आसा.
आयची शिक्षण पद्दती हीं प्रयोगशीलतायेचोय आस्पाव करपी आसा. विद्यार्थ्यांक पुस्तकांतल्या ज्ञाना वांगडा प्रत्यक्ष अणभवांतल्यान मेळपी ज्ञान दिवपीय आसा. शेती विशी विज्ञान, सामाजीक विज्ञान तशेच जीवशास्त्र विशयांत वर्गकुडींत पाठ विद्यार्थी शिकताच, पूण तांकां तें पाठ आनीक बरे तरेन समजूचें आनी सैमा विशीं भुरग्यांच्या मनांत संवेदनशीलताय जागी जावची ह्या हेतांतल्यान शेतकारान हीं शिक्षकाची भुमिका साकारली.
हें शेतकाम करताना आपल्याक धादोसकाय मेळटा आनी ही माती आपल्याचेर सदांच बरें संस्कार करता आनी तेच विद्यार्थ्यांक गावचें म्हूण आपणें केल्लो हो एक यत्न अशें मत शेतकार दत्ता मांडटात. शेतकार स्वता शिक्षक जावन अशे तरेन जेन्ना विद्यार्थ्यांक शेतकाम शिकयता. रोप कशें लावप मेरेन तें आयची आधुनीक मशिनरी कशी वापरप तें दाखयता तेन्ना विद्यार्थ्यांची तरणी मनां शेतवडी कडेन निश्चितच वळटलीं हाची खात्री आसा. दत्ता नायक हांच्या सारक्या शेतकारांनी एक-दोन दीस काय जायना, पूण शिक्षकाचे भुमिकेन विद्यार्थ्याक अशें तरेचें शिक्षण दीत रावचें. तातूंतल्यान आमची भूंय आनी आमचो सैम हांचे कडेन फुडल्या पिळगेची घट्ट इश्टागत जातली.
गौरांग गोकुळदास नायक
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
