भांगरभूंय | प्रतिनिधी
म्हापशें ः बर्च बाय रोमिओ लेन क्लबा खातीर अकबारी खात्याचो (उत्पादन शुल्क) परवानो मेळपा खातीर कांदोळी भलायकी केंद्राचो बनावट भलायकी दाखलो तयार केल्ल्याच्या प्रकरणांतलो दुबावीत आरोपी तशेंच रोमिओ लेनाचे सह धनी अजय गुप्ता हाचो म्हापशें प्रथम वर्ग न्यायालयान सशर्थ जामीन अर्ज मंजूर केला.
फाटल्या २३ डिसेंबर २०२५ दिसा म्हापशें पुलिसांनी ह्या बनावट दाखलो प्रकरणांत अजय गुप्ता हाका अटक केल्ली. उपरांत दुबावितान म्हापशेंच्या पयलो वर्ग न्यायालयांत जामिना खातीर अर्ज दाखल केल्लो. शेनवारा ता. ७ फेब्रुवारीक सकाळीं न्यायालयान हो अर्ज मंजूर करपी निवाडो दिला. दुबावीत आरोपी बर्च अग्नितांडव प्रकरणांत आजूनय न्यायालयीन बंदखणींत आसा.
मजगतीं, कांदोळी मुळाव्या भलायकी केंद्राचे अधिकारी डॉ. रोशन नाझारेथ हांणी म्हापशें पुलिशेंच फाटल्या ता. १७ डिसेंबर २०२५ दिसा ह्या बनावट दाखल्या विशीं कागाळ दाखल केल्ली. हो प्रकार १३ डिसेंबराक आदीं अकबारी खात्याच्या म्हापशें निरीक्षक कार्यालयांत घडिल्लो. बर्च उजो दुर्घटना प्रकरणाच्या पुलीस चवकशे वेळार दुबावितांचो होहा बनावटगिरी आनी फटींगपणाचो प्रकार उक्तडार आयलो.
उपरांत वयले कंपनी सयत कंपनीचे अधिकृत मालक आशिल्ले सौरभ लुथरा, गौरव लुथरा आनी अजय गुप्ता हांचे आड भारतीय न्याय संहितेच्या ३३६(२), ३३६(३), ३३८, ३४०(२), ३१८(४) आनी ३(५) कलमा खाला गुन्यांव नोंद केल्लो.
मजगतीं, साकवाडी हडफडेंच्या सर्वे नंबर १५९/० मदल्या घर नंबर ५०२/१त चलपी जीएस हॉस्पिलिटी एलएलपी कंपनीच्या आस्थापना खातीर उत्पादन शुल्क परवानो मेळोवपाच्या हेतान दुबावीत आरोपींनी समान हेतान मुद्दाम आनी अप्रमाणिकपणान कांदोळी मुळाव्या भलायकी केंद्राचें नाहरकत प्रमाणपत्र (एनओसी) तयार केलें. जातूंत दुबावितांनी फिर्यादींची नक्कल करून सय बनावट केली आनी रजिस्टरच्या बनावट नोंदीचो वापर केलो.
उपरांत हो बनावट दाखलो खरो आशिल्ल्याचें भासोवन तो उत्पादन शुल्क खात्याकडेन सादर केलो. जाका लागून उत्पादन शुल्क परवान्या खातीर कागदोपत्री वेव्हार पुराय करपाक मेळटलो आनी दुबावीत आरोपी हे हो उत्पादन शुल्क परवानो मेळोवपाक येसस्वी जाले. जाका लागून फिर्यादी तशेंच अकबारी अधिकार्यांची फसवणूक केल्ल्याच्या आरोपा खाला म्हापशें पुलिसांनी बनावटगिरी आनी फटींगपणाचो गुन्यांव नोंद केल्लो.
जाल्यार ह्या प्रकरणांत अटक टाळपा खातीर दुबावीत आरोपी सौरभ लुथरा आनी गौरव लुथरा हांणी अटकपूर्व जामीना खातीर न्यायालयांत धांव घेतल्या. ह्या अर्जाचेर सुनावणी म्हापशें अतिरिक्त जिल्लो सत्र न्यायालयांत सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
