भांगरभूंय | प्रतिनिधी
खासदार सदानंद शेट तानावडे: ऑनलायन फटींगपणाचीं प्रकरणां वाडटात
पणजी : गोंयच्या पर्यटनाक सायबर फटींगपणाचो फटको बशिल्ल्यान हॉटेल बुकींग, डिजिटल पेमेंटा कडेन संबंदीत ऑनलायन फटींगपणाचीं प्रकरणां वाडतूच आसात. हातूंतल्यान पर्यटकांक बरोच अर्थीक फटको बसपा वांगडा पर्यटनाची मजा घेवपाचे सुवातेर ताण सोसचो पडटा. ह्या वाडपी प्रकरणांची नोंद घेवपी राज्यसभा खासदार सदानंद शेट तानावडे हांणी गोंयांत तशेंच हेर राज्यांत वाडपी अशे तरेच्या घडणुकांचेर खर कारवाय करपा खातीर पावलां उखलपाची मागणी केंद्र सरकारकडेन केल्या.
खासदार सदानंद शेट तानावडे हांणी शुन्य काळा मजगतीं राज्यसभेंत हो मुद्दा हाजीर केल्लो. गोंय हें एक संवसारीक पांवड्यावेलें मुखेल पर्यटन केंद्र. गोंयांत पर्यटकांचो आंकडोय दिसान दीस वाडतूच आसा. मात, सायबर फटींगपणाचो फटको गोंय आनी हेर राज्यांच्या पर्यटनाक बसता. हॉटेल बुकींग, डिजिटल पेमेंटसंबंदी फटींगपणाच्या प्रकारांत पर्यटक आडकतात.
नामनेचीं हॉटेलां, बुकींग पोर्टल्सच्या नांवान तयार केल्लीं बनावट हॉटेल्स, होमस्टे, फटींग वेबसायटी हातुंतल्यान पर्यटकांची व्हड फटवणूक जाता. बुकींगच्या नांवान पयलींच पेमेंट करून घेतात. मात, गोंयांत येवन पळयल्यार असलें कसलेच तरेचें बुकींग नाशिल्ल्याचें आनी फटींगपणां जाल्ल्याचें कळून चुकता. तातुंतल्यान पर्यटकांक बरोच नेटान अर्थीक फटको बसता.
डिजिटल फसवणुकेचा गंभीर धोको गोंयच्या आनी भारताचे पर्यटन सुरक्षेक आनी प्रतिमेक आशिल्ल्याचें खासदार सदानंद शेट तानावडे हांणी राज्यसभेंत स्पश्ट केलें. सरकाराक पर्यटन संबंदीत वेबसायटी खातीर खर ‘केवायसी’ नेम लागू करपाचे आनी फटींग प्लॅटफॉर्मार नदर दवरून कारवायेची मागणी केली. पर्यटकांची शारीरिक सुरक्षा सुनिश्चीत करपा वांगडाच डिजिटल सुरक्षेचेरूय भर दिवपाची मागणी खासदार सदानंद शेट तानावडे हांणी राज्यसभेंत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
