भांगरभूंय | प्रतिनिधी
दोगांक अटक; खंडणी खातीर तामिळनाडूच्या पर्यटकांक मारपेट
भांगरभूंय । प्रतिनिधी
म्हापशें: तामिळनाडूंतल्या पर्यटकांक मारपेट केले उपरांत खंडणी खातीर तांचें अपहरण केल्लें. कळंगूट पुलिसांनी 12 वरां भितरूच पर्यटकांची सुटका केली आनी ह्या प्रकरणाचो तपास केलो.
इम्रान कुराशी (28, रा. मुड्डोवाडो कळंगूट, मूळ उत्तर प्रदेश) आनी मार्शल कार्दोज (31, रा. मुड्डोवाडो कळंगूट) ह्या दोगा दुबावितांक पुलिसांनी ह्या प्रकरणांत अटक केल्या.
ही घडणूक 19 ऑगस्टाक फांतोडेर 4.15 वरांच्या सुमाराक घडली. फिर्यादी वसंत चक्रवर्ती आनी मनोज असोकाम हे तामीळनाडूंतले दोन विद्यार्थी गोंयांत पर्यटना खातीर 16 ऑगस्टाक आयिल्ले. ते बागा कळंगूटच्या एका गेस्ट हावसांत रावताले.
शुक्रारा मध्यान रातीर ते दोगूय विद्यार्थी हडफडेंच्या एका नायट क्लबांत गेल्ले. थंयच्यान ते फांतोडेर दुचाकी वयल्यान कळंगूटेच्या सर्सोई रॅस्टोरॅण्टा कडेन आयले. थंय कांय चलयो उब्यो आशिल्ल्यो. तांचे कडेन तांणी गजाली मारल्यो. तेन्नाच दोन अज्ञात मनीस (वयले दुबावीत) थंय आयले आनी तांणी ह्या विद्यार्थ्यांक मारपेट केलो, तशेंच धमकी दिली.
मारपेटाच्या भंयान दुबावितांचे तावडेंतल्यान सुटून तांणी दुचाकी वयल्यान पळ काडलो. सुमार तीन किलोमिटर अंतराचेर दुबावितांनी बागा हडफडें मेरेन तांचो फाटलाव केलो आनी दुचाकी आडवी घालून तांकां आडायले. थंय तांकां परतून मारपेट केलो. चाकवाचो भंय दाखोवन दुबावितांनी मनोज असोकान हाचें आपले दुचाकी वयल्यान अपहरण केलें. जाल्यार फिर्यादी वसंत चक्रवर्ती हाणें जिवाच्या भंयान दुबाविताचे तावडेंतल्यान सुटून पळ काडलो.
दुबावितांनी पिडेस्त मनोजाक मुड्डावाडो कळंगूटच्या रोजीस गेस्ट हावसांत हाडलो. थंय ताका बंद करून दवरलो आनी मारपेट केलो. ताका घरा फोन करून एक लाख 60 हजाराची खंडणीची रक्कम धाडपाक लायली. दुबावितांनी पिडेस्ताच्या घरा खंडणी खातीर केल्लो फोन लागूंक ना.
फिर्यादी कसोबसो आपल्या गेस्ट हावसांत पावलो आनी सकाळीं उठून कळंगूट पुलीस स्टेशनाचेर गेलो. पुलिसांनी सीसीटीव्ही फुटेज आनी हेर म्हायतीच्या आदारान दुबावितांची वळख पटयली. ते उपरांत खात्रेच्या सुत्रांच्या आदारान त्या गेस्ट हावसाचेर धाड घातली आनी अपहरण केल्ल्या मनोजाची सुटका केली.
दुबावीत इम्रान कुराशी आनी मार्शल कार्दोज हांकां ताब्यांत घेवन गुन्यांव नोंद केलो आनी रितसर अटक केली. तें गेस्ट हावस दुबावीत इम्रान कुराशी चलयतालो. जाल्यार दुबावीत मार्शल हो ताच्या वांगडा रावतालो.
पंगडांतले पुलीस
पुलीस उपअधिक्षक विश्वेश कर्पे आनी निरिक्षक दत्तगुरू सावंत हांच्या मार्गदर्शना खाला उपनिरिक्षक किरण नायक, हवालदार विद्यानंद आमोणकार, कॉन्स्टेबल मनोज नायक, गौरव चोडणकार, पिटर फर्नांडीस, अमीर गाड, गणपत तिळोजी आनी आकाश नायक ह्या पंगडान ह्या अपहरणाचो 12 वरां भितर येसस्वी तपास केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
