स्मार्ट पणजेची घुस्मट थांबोवया

भांगरभूंय | प्रतिनिधी

म्हापालिका वेंचणुके वेळार मोटारीच न्हय मोटारसायकली, स्कुटरी पार्किंगाची नवी सुविधा दिवपाची मागणी मतदारांनी करची. पणजेंतल्यो पासयो येरादारीचे कोयंडेंत पार्किंग सुविधा म्हणून उपेगी थारतात.

भूंय म्हजी भांगराची, भांगराळी अशें आयकत व्हड जाल्ल्या 75 वर्सां पिरायेच्या गोंयच्या आदल्या आमदारांची घुस्मट कित्याक जाता? राज्याच्यो विधानसभा वेंचणुको लागीं येतना तांकां राजकारण, गोंय बदलता हें होल्मलां. उदरगतीच्या मार्गार वचपी स्मार्ट पणजेची घुस्मट जाता तें तांकां दिसलां आसतलें. स्मार्ट पणजेक नवी वाट दाखोवपी म्हापालिका वेंचणुकेचें झुज रोखडेंच जातलें. इश्ट, दुस्मान एक जावन मतदान जाल्यार राजपाटणांतल्यान गोंय विधानसभा वेंचणुकेची दिका कळटली.
जिल्हो, म्हापालिका, नगरपालिका, विधानसभा, पंचायत वेंचणुकांचेर जावपी खर्च उणो कसो जातलो? एक राज्य, एक वेंचणूक धोरण राज्यांनी आपणावपाची देसाक नवी वाट दाखोवपाक गोंय फुडें सरत व्हय? स्मार्ट पणजेंतल्या मांडवी न्हंये वयल्या ‘वाॅक वे’चेर स्मार्ट सुण्यांक भोंवडावपाची दिसपटी मेळत व्हय? पणजी स्मार्ट जाली, लाव ताळगांव, रायबंदर, ओल्ड गोवा वाठाराकय मेळ्ळा. देसांत सानुलीं शारां जल्माक घालपाची वाट स्मार्ट सिटीन दाखयल्या. स्मार्ट शारांच्या लागसार स्मार्ट वाठार म्हापालिकेक दिवपाचें हेंच वर्स. दायजाक नव्या रुपा, रंगांत व्हरपाक आरंभ जावचो.
पणजे आल्तिनार, महालक्ष्मी मुख्यमंत्र्यांची सरकारी कचेरी आनी घर.
स्मार्ट पणजेंतल्या पुस्तक उत्सवांत हालींच मुख्यमंत्री डाॅ. प्रमोद सावंत मेकळेपणान उलयले. त्या उत्सवांतल्या पुस्तकांतल्यान पणजेचो नवो मार्ग तांकां दिसलो आसतलो. विधानसभा वेंचणुकेंतल्यान विकसीत गोंयचे दिकेन वचपाचें गिन्यान तांकां मेळ्ळां पुस्तकांच्या पेटलांत. ते वाचतात मोबायलार फकत खबरो न्हय पुस्तकांय. पुस्तकां तांकां व्हड गिन्यांनी करतात. गोंयची माती, राजभास कोंकणीची याद करुन दिता. प्रशासन स्तंभ त्याच पुस्तकांनी तांकां मेळ्ळो आसतलो. घुस्मटिल्ली स्मार्ट पणजीय मेकळेपणान तांचे कडेन उलयता येरादारीचे कोयंडेतल्यान.
पणजी म्हापालिका वेंचणुकेंत मतदारांक अंदू शार 100 टक्के स्मार्ट करपाचें उतर दिवपी ‘व्हिजन’ मेळपाची गरज आसा. गाडी आसा पूण डाॅ. आॅस्कर रिबेलो चलतात तिनसांजच्या वगतार तें तांकां खबर आसतलेंच. भिवपाची गरज ना हो तांचोय मंत्र, दुयेंतीक आत्मविश्वास दिवपी. चलता, भोंवतना डाॅ. रिबेलो आत्मचिंतन करतात. डाॅ. रिबेलो तुयां जावपी नव्या वैजकी म्हाविद्यालयांत सप्तकांत एक दीस गेल्यार गुणेस्त दोतोर फुडारांत मेळटले. स्टारलिंक सेवेंतल्यान ते तुयांतल्या, म्हाविद्यालय, हाॅस्पिटलाक मार्गदर्शन पणजेंत रावन करतले ही आस्त आसा.
गोंयच्या सगल्या तालुक्यांतल्या स्मार्ट दोतोरांचें, उद्येगपतींचें, आर्किटेक्ट, इंजिनियरांचें, राजकारण्यांचें स्मार्ट पणजी घर. पणजेचे आमदार, कोयर वेवस्थापनमंत्री बाबुश (आतानासियो) मोन्सेरात हांचे चडशे इश्ट, दुस्मानय तातूंत आसात. पणजी येरादारीचे कोयंडेत घुस्मट्टा ती थांबोवया, आडावया अशें पणजेच्या आमदारांक तांचे इश्ट, दुस्मान सांगतात व्हय? पणजे म्हापालिका वेंचणुके निमतान ते घराघरांनी भोंवतले तेन्ना तांकां सगलेच येवकार दितले. पणजेची घुस्मट सगल्यांनी थळाव्या आमदारांक सांगप समा जातलें. पणजे येरादारीचे कोयंडेंत तेय घुसमट्टात, नित्य नासली तरी आत्र्या पयऱ्यान तांचीय घुसमट जाता. पणजेचे पयले म्हापौर तांच्या फाटल्यान आसल्यार 2026 चे म्हापालिका वेंचणुकेंत तांकां भिवपाची गरज ना. मुख्यमंत्री डाॅ. सावंत हांकांय ते येरादारीचे कोयंडेंत अंदल्ले पणजेची वाट दाखोवंक शकतात. समाजाचीं गणितां ते सोडोवपी, भाजपाचो पणजे मतदारसंघाचो किल्लो तिगोवपांत आयजय तांचो व्हड आधार. प्रदेस भाजपाध्यक्षांनी उलो माल्ल्यार ते ना म्हण्टले?
येरादारीचे कोयंडेची पणजेंतली घुस्मट सोडयतना शारांतले भौशीक सुवातींनी भोंवपी, न्हिदपी सुण्यांक दवरपाक सुवात जाय. अचकित भौशीक सुवातेर भुरग्यांचेर, जाण्ट्यांचेर गळ्यांत पटो नाशिल्ले, आशिल्ले सुणे घुरी घालतात. भिरांकुळ अवस्थेंत आशिल्ल्या, दुयेंत सुण्यांची गजाल वेगळीच. ते आंगार येतना अॅक्सिडेंट जावंक शकतात हाची जाणवीकाय म्हापालिका वेंचणुकेंत देंवतल्यांनी दवरची. जांकां सुणो चाबता, जांच्या आंगार सुणो उडी घालता ती म्हायती सीसीटीव्ही कॅमेरे दितात. पणजे भलायकी खात्याचे बिल्डिंगेत, अर्बन हेल्थ सेंटरांत तांची वळेरी आसतलीच. भौशीक सुवातींतल्या सुण्यां खातीर जावपी पणजेच्या मतदारांची घुस्मट थांबोवपाची गरज आसा.
पणजे अर्बन हेल्थ सेंटराक नवी बिल्डिंग मेळपाक जाय. दायज म्हणून आशिल्ली बिल्डिंग, सुवात, वाठाराक नवें रुप दिवपाची येवजण म्हापालिका वेंचणुकेच्या जाहीरनाम्यात आसची. भलायकी खात्याचे बिल्डिंगेक, जुन्ता हावसाक “रिडेव्हेलाॅपमेंट” येवजणेंतल्यान चकचकीत करप शक्य आसा व्हय? बिल्डिंगेचें स्ट्रक्चरल आॅडिट करपाचें उतर म्हापालिकेच्या जाहीरनाम्यांत मतदारांक मेळचें. फार्मासी म्हाविद्यालय अंदूं तात्पुरतें सुदारलां. अभ्यास केल्यार एक मजलो तेच बिल्डिंगेक चडोवंक मेळटलो. आर्ट, आर्किटेक्चर म्हाविद्यालयांचेर मुख्यमंत्र्यांनी एकदां नदर घालची.
म्हापालिका वेंचणुके वेळार मोटारीच न्हय मोटारसायकली, स्कुटरी पार्किंगाची नवी सुविधा दिवपाची मागणी मतदारांनी करची. पणजेंतल्यो पासयो येरादारीचे कोयंडेंत पार्किंग सुविधा म्हणून उपेगी थारतात. तांची येरादारीचीं साधनां घेवपाची कॅपेसिटी (तांक) मेजपाचो होच वगत. शारा भायलो पार्किंग प्लाझा आतां ल्हान जावंक लागला. बांदकाम चालू आसतना तो पयले फावट पत्रकारांक दाखोवपी आदले पर्यटनमंत्री दिलीप परुळेकार हांची याद जाता. सुरवेक उपेगांत उणो पडपी पार्किंग प्लाझा फुडारांत म्हत्वाचो जातलो हें तेन्ना तांकां कळिल्लें. पणजे म्हापालिका वेंचणुकेंत तांची भाजपाक मजत जातली. शारांतली येरादारीची कोयंडी थांबोवपाक ते समाजाक एकठांय हाडत व्हय? तांचोय समाज राजपाटणांतल्यान व्हड जाला, विखुरला तरी एक जाल्यार म्हान कित्याक जावचो न्हय?
शारांत सुलभ टाॅयलेटस जाल्यांत, कदंब बसस्टॅंडा सावन हेर मुखेल रस्त्यारय. वाॅशरुम्स, बाथरुम्स मेळ्ळ्यार लोकोत्सवांत आयिल्ल्या हेर राज्यांतल्या वेपाऱ्यांक लोकोत्सवाच्या माटवांत रावप सोंपें जातलें. कांपाला वेल्यान लोकोत्सव धांवडायात म्हणपी नगरसेवक परत म्हापालिकेंत आयल्यार प्रदेस भाजपाक नवें नेतृत्व मेळटलें. वाॅक वे वयल्या परशुरामाक नवो तकटो म्हापालिका वेंचणुकेंतल्यान मेळचो. स्मार्ट सिटी कंपनी तकटो दिवपाक कांचवेल्यार मुख्यमंत्री, भलायकीमंत्री, कोयर वेवस्थापनमंत्री, पर्यटनमंत्री तो दिवंक शकतात.
म्हापालिका वेंचणूक लागीं येतना शारांत नवे तक्टे लागल्यात, शार पाचवेंताल्ल दवरपाची ती दिका. ते हिंदींत आसल्यार विकएंडाक येवपी भायल्या पर्यटकांक उपेगाचे. स्मार्ट पणजेंत विदेशी नागरीक मतदार फाटल्या पांच वर्सांनी जाल्यात. नवे मतदार वळेरेंत ते दिसतले व्हय?

सुहासिनी प्रभुगांवकार
9881099260