दर वर्सा एक विदेशी वस्तू स्वदेशींत बदलात : प्रधानमंत्री

भांगरभूंय | प्रतिनिधी

खबरां संस्था

नवी दिल्ली : आमची फणी, टूथब्रश सगळेंच विदेशी. दर वर्सा एक विदेशी वस्तू स्वदेशी करात आनी विकसीत भारताचे सपन साकार करात, असो उलो प्रधानमंत्री नरेंद्र मोदी हांणी मारलो.

प्रधानमंत्री मोदी ‘परिक्षा पे चर्चा’ कार्यावळींत देशभरांतल्या विद्यार्थ्यां कडेन संवाद सादतात. 9 वे आवृत्तींत प्रधानमंत्री विद्यार्थ्यांक परिक्षे मजगतीं तणावमुक्त रावपाक मजत करचे खातीर शिकपाचेर लश्र केंद्रीत करचे खातीर टीप्स दितात. ह्या वेळार तांणी वयली गजाल सांगली.

27 जनेवारीक परिक्षा पे चर्चा कार्यावळीचे 9 वे आवृत्तीचो व्हिडियो रिलीज जाल्लो. जातूंत प्रधानमंत्री वेगवेगळ्या वाठारांतल्या भुरग्यां वांगडा प्रस्न जापो करतना दिसले. दिल्ली, कोयंबतूर (तामीळनाडू), रायपूर (छत्तीसगड), देव मोगरा (गुजरात) आनी गुवाहाटी (आसाम) ह्या पांच राज्यांतल्या विद्यार्थ्यां कडेन प्रधानमंत्र्यान संवाद सादलो.

परिक्षा पे चर्चाचे 9 वे आवृत्तींत 4.5 कोटीं परस अदीक नोंदणी केल्ले आनी 2.26 कोटी अतिरिक्त लोक आशिल्ले, जांणी विवीध उपक्रमांनी वांटो घेतलो.

स्वातंत्र्याक 100 वर्सां पुराय जातलीं तेन्ना तुमी 39- 40 वर्सां पिरायेचे आसतले. तुमी आतांच विकसीत भारताक तुमचें सपन करपाक जाय. स्वातंत्र्याचें सपन काळजांत दवरून भगतसिंग फांसार गेले. स्वातंत्र्या आदीं 25 आनी 30 वर्सां आदीं दिल्ल्या बलिदानाक लागून स्वातंत्र्य मेळ्ळें. विकसीत भारता खातीर तुमकां कितें करपाक जाय, ताचें सपन तयार करात, अशें प्रधानमंत्र्यांनी सांगलें. सादरीकरण करतना आपल्याक भंय दिसता. ह्या भंयाचेर जैत जोडपाक कितें करूं? असो प्रस्न एका विद्यार्थ्यान प्रधानमंत्र्यांक विचारलो. ताका जाप दितना प्रधानमंत्री मोदी हांणी सांगलें, फुटपाथाचेर चलपी एक गरीब बायल लेगीत टीव्ही वयले घडणुके विशीं कितल्या आत्मविस्वासान उलयता हें तुमी केन्ना पळयलां? तिणें मुलाखती खातीर सराव केलो? ना. तिचो आत्मविस्वास सत्यांतल्यान येता. तिका खबर आसा, जें पळयलां तेंच सांगपाचें आसा. जर तुमकांय तुमच्या कामाचेर विस्वास आसत जाल्यार सादरीकरणाचो भंय पळून वतलो.

‘पंचतंत्र आनी अभिमन्यूचेर आदारीत खेळ तयार करात’

गोंयांतलो श्रीजीत गाडगीळ हांणी विचारलें, आपल्याक गेमिंगांत खूब आवड आसा, पूण आपल्या पालकांक तें कळना. आपणें कितें करचें? प्रधानमंत्री मोदी हांणी जाप दिली, भारत कथांनी भरला. तुमी स्वताचे खेळ तयार करचे. पंचतंत्राच्या कथांचेर आदारीत खेळ तयार करात, अभिमन्यूचे कथेचेर आदारीत खेळ तयार करात आनी तुमची स्वताची वॅबसायट तयार करात, ती लॉन्च करात. ल्हवू ल्हवू तुमकां दिसतलें, लोक तुमचे खेळ खेळटात.