भांगरभूंय | प्रतिनिधी
उड्डाण पुलाच्या कामा खातीर येरादारींत बदल
भांगरभूंय । प्रतिनिधी
पणजी : पर्वरी उड्डाण पुलाच्या दुसऱ्या पावंड्या वयल्या कामा खातीर येरादारी घुंवडावप/ रस्तो बंद करपी अधिसुचोवणी जिल्होधिकाऱ्यांनी जारी केल्या. दुसऱ्या पावंड्या वयल्या कामा खातीर 19 मार्च 2026 मेरेन दामियन दे गोवा ते ह्युंडाय शो रूमा मेरेन आनी ओ कोकेरो जंक्शन ते डॉ. अनिल डिसील्वा हांच्या घरा मेरेन येरादारींत बदल जातलो. पयल्या पावंड्या वयले काम सुरू जातकच दुसऱ्या पावंड्या वयले काम सुरू जातलें, अशें जिल्होधिकाऱ्यांनी स्पश्ट केलां. येरादारी घुंवडावपाचे सुवातेर सुचोवणी तकटो उबारप सक्तीचें आसतलें.
उत्तर गोंयचे जिल्होधिकारी अंकीत यादव हांणी अधिसुचोवणी जारी केल्या. उड्डाण पुलाच्या सेगमेंटाची येरादारी रातच्या वेळार जातली. येरादारी घुंवडायली तरी अॅम्बुलन्स, उजो पालोवपी दळाची गाडी वचपा खातीर एक बाजू उक्ती उरपाक जाय. येरादारी घुंवडायता त्या थळार कंत्राटदारान दोन मार्शल दवरप सक्तीचें आसा. येरादारी पुलिसां कडेन मनीसबळाचो उणाव आशिल्ल्यान येरादारी वेवस्थापना खातीर कंत्राटदाराक मार्शल दवरप बंधनकारक आसा. कंत्राटदारान येरादारीचेर लक्ष दवरपा खातीर खासा सुपरवायजराची वेवस्था करप गरजेचें आसा.
तशेंच दुसऱ्या पावंड्या वयले काम पुराय जातकीर तिसऱ्या पावंड्या वयले काम सुरू करपाक मेळटलें, अशें अधिसुचोवणेंत स्पश्ट केलां. पर्वरी उड्डाण पुलाचें 60 टक्के काम पुराय जालां. ऑक्टोबर मेरेन काम पुराय करून 19 डिसेंबराक पुलाचें उक्तावण करपाची सरकाराची मोख आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
