भांगरभूंय | प्रतिनिधी
मुख्यमंत्री : फोंडें उपजिल्हो हॉस्पिटलांत न्युरो सर्जना खातीर प्रक्रिया
भांगरभूंय । प्रतिनिधी
फोंडें : फोंडेंच्या उपजिल्हो हॉस्पिटलांत न्युरो सर्जन उपलब्ध करून दिवचे खातीर प्रक्रिया सुरू केल्या. शारांत सिटी बस स्टॅण्ड उबारचे खातीर फोंडें पालिकेन जमीन उपलब्ध करून दिवची. रवी नायक हांच्या सपनांतलें फोंडें साकार करचे खातीर सरकार बांदील आसा, अशें मुख्यमंत्री डॉ. प्रमोद सावंत हांणी सांगलें.
फोंडेंच्या राजीव गांधी कला मंदिरांत आयोजीत केल्ल्या सरकार तुमच्या दारी कार्यावळींत मुख्यमंत्र्यां वांगडा वीज मंत्री सुदिन ढवळीकार, उदकास्रोत मंत्री सुभाष शिरोडकार, आमदार गोविंद गावडे, नगराध्यक्ष वीरेंद्र ढवळीकार, राजीव गांधी कला मंदिराचे अध्यक्ष रितेश नायक, जिल्हो पंचायत वांगडी गणपत नायक, प्रितेश गांवकार, गौरी शिरोडकार, सरपंच नावेद तहसीलदार आनी हेर मानेस्त हाजीर आशिल्ले.
डबल इंजीन सरकार गोंयांतल्या लोकांचे सोयी खातीर खूबश्यो सुविधा, तेच वांगडा येवजण्यो चालीक लायता. पूण विरोधक ताळमेळ नाशिल्ले आरोप करून लोकांची दिशाभूल करपाचो यत्न करतात. नितळसाणी खातीर लेगीत सरकार कोटींनी रुपया खर्च करता. तशेंच बेरोजगारीचेर उपाय काडचे खातीर सरकारान बेरोजगारां खातीर खास येवजण सुरू केल्या, अशें मुख्यमंत्री डॉ. सावंत हांणी सांगलें.
मंत्री ढवळीकार हांणी सांगलें, सरकार तुमच्या दारी खाला लोकांक चड सुविधा उपलब्ध करपाक सरकाराक येस आयलां. सरकाराच्यो सगल्यो येवजण्यो आनी उपलब्ध करून दिल्ल्यो साधन सुविधा लोकांनी घेवपाची गरज आसा. मंत्री शिरोडकार हांणी सांगलें, अंत्रूज म्हाल नंबर 1 करचे खातीर यत्न जावपाक जाय. ते खातीर लोकांनी सरकाराक आदार करपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
