भांगरभूंय | प्रतिनिधी
मानवाधिकार आयोगाचो भलायकी संचालकांक आदेश
पणजी : चोडणा 24 वरां सेवा दिवपी (24X7) आपत्कालीन भलायकी केंद्र सुरू करपाचो आदेश गोंय मानवाधिकार आयोगान भलायकी खात्याच्या संचालकांक दिला. चोडण बेटाचेर आरएमडी आसली तरी 24 वरां भलायकी सेवेची वेवस्था उपलब्ध नाशिल्ल्यान लोकांची गैरसोय जाता अशी कागाळ युवराज मांद्रेंकार हांणी केल्ली. हे कागाळीचेर अहवाल दितना आयोगान हो आदेश दिला.
गोंय मानवाधिकार आयोगाचे कार्यकारी अध्यक्ष डेस्मंड डिकोस्ता आनी वांगडी प्रमोद कामत हांणी हो आदेश दिला.
चोडणा भलायकी केंद्र आसा मात रातच्या वेळार दोतोर नाशिल्ल्यान 24 वरां सेवा उपलब्ध जाय ना, अशी कागाळ चोडणेचे ग्रामस्थ युवराज मांद्रेंकार हांणी केल्ली. हे कागाळीचेर सुनावणी जाली. पुराय वेळ दोतोर नाशिल्ल्यान भलायकी सेवा उपलब्ध जाय ना, अशी तांची कागाळ आशिल्ली. चोडण सावन पणजे वतलो जाल्यार रातीक फेरीबोटीक लागून दोतोराकडेन पावपाक उशीर जाता. हाका लागून चोडणाच्या लोकांक रातच्या वेळार दिवचले वचचें पडटा. चोडण सावन दिवचल पयस आसा. हाका लागून गंभीर दुयेतींच्या जिवाक धोको निर्माण जाता.
भलायकी संचालकांनी चोडण भलायकी केंद्रांत (आरएमडी) आपत्कालीन सेवा केंद्र स्थापन करपाचो प्रस्ताव सरकाराक सादर केला. वर्साचो 45 लाखांच्या खर्चा सयत एकंदर 67 लाख 76 हजार रूपया खर्च येतलो. हो प्रस्ताव सादर केल्ल्याची म्हायती भलायकी संचालकांनी सुनावणी वेळार दिली. 90 दिसांत आपत्कालीन भलायकी सेवा केंद्र स्थापन करपाचो आदेश आयोगान दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
