भांगरभूंय | प्रतिनिधी
ॲप सेवा टॅक्सीवाल्यांक, गोंयकारांक परवडपा सारकी न्हय : टॅक्सी संघटणा
पणजी : गोवा मायल्स, गोंयचो पात्रांव, ॲप ऍग्रीगेटर आनी आतां भारत टॅक्सी अशें वेगवेगळे उपक्रम टॅक्सी सेवेंत सुरू आसात. सरकाराक टॅक्सी वेवसाय गोंयकारांच्या हातांत उरिल्लो जाय काय नाका? हें सरकारान स्पश्ट करपाक जाय. टॅक्सी ॲप टॅक्सीवाल्यांक तशेंच सर्वसामान्यांक परवडपी नाशिल्ल्यान आमचो हाका विरोध आसतलो, अशें टॅक्सी धनी संघटणेचे अध्यक्ष चेतन कामत हांणी स्पश्ट केलां.
राज्यांत खंयचो ॲप आसचो? हे विशीं सरकारा मदीं संभ्रमावस्था आसा. टॅक्सी धोरणा विशीं चर्चा सुरू आसा. मसुदो तयार आसा. मागीर सरकार धोरण निश्चीत करपा खातीर कळाव कित्याक करता? असो प्रस्न चेतन कामत हांणी केला. भारत टॅक्सी ॲप सेवा कशी आसतली? राज्यांत केन्ना सुरू जातली? हे विशीं कितेंच जाहीर जावंक ना. हे विशींची अधिसुचोवणी जारी जाली काय बसका घेवन ताचेर आमी आमची भुमिका स्पश्ट करची. तरी निश्चीतपणान भारत टॅक्सी ॲपाक आमचो विरोध आसतलो, अशें चेतन कामत हांणी सांगलें.
सरकारान सुरवातेक गोवा मायल्स ॲप सेवा सुरू केली. उपरांत ॲप ऍग्रीगेटर धोरणाचो मसुदो हाडलो. आतां भारत टॅक्सी अॅप सुरू जातलो. राज्यांत कितल्यो ॲप सेवा सुरू करपाच्यो आसात? परराज्यांतल्या टॅक्सीवाल्यांक राज्यांत हाडपाचो हो डाव, असो आरोप चेतन कामत हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
