भांगरभूंय | प्रतिनिधी
वास्को : मुरगांवचे उपनगराध्यक्ष रामचंद्र कामत हांचे आड दाखल केल्लो अविस्वास थाराव १३ मतांनी मंजूर जाला. मात, अविश्वास थाराव अवैध आशिल्ल्याचो दावो करीत कामत हांच्या समर्थक नगरसेवकांनी न्यायालयांत वचपाची शिटकावणी दिली.
शुक्रारा नगरपालिकेच्या सभाघरांत जाल्ले बसकेंत उपनगराध्यक्ष रामचंद्र कामत हांचेर अविश्वास थाराव १३ मतांनी मंजूर जालो. उपरांत कामत हांकां फाटबळ दिवपी नगरसेवकांनी ताका हरकत घेतली. अविश्वास थाराव मांडपा खातीर सादर केल्लें पत्र कसल्याच नगरसेवकाच्या नावान नाशिल्लें आनी तातूंत नमूद केल्लें नांव चुकीचें आशिल्लें. हाका लागून हो थाराव अवैध आशिल्ल्यान बसका रद्द करपाची मागणी तांणी केली. तरी अविस्वास थारावाचेर बसका जाली. आनी थाराव मंजूर जाल्ल्यान कामत हांकां फाटबळ दिवपी नगरसेवकांनी बसके उपरांत ह्या निर्णया आड न्यायालयात न्याय मागतले अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
