भांगरभूंय | प्रतिनिधी
नवी दिल्ली: संघ भौशीक सेवा आयोगान ४ फेब्रुवारीक नागरी सेवा परिक्षे खातीर अधिसुचोवणी जारी केल्या. हे अधिसुचोवणेंत ४० चुको सांपडल्यात.
अधिसुचोवणेंतल्या पान 2चेर ‘Examination’ जाग्यार ‘Examinaiton’ आनी ‘candidates’ जाग्यार ‘cadidates’ अशें बरयलां. जाल्यार, पान 7चेर ‘Benchmark’ जाग्यार ‘Bechmark’, ‘Functional’ जाग्यार ‘Functinal’ आनी पान 8 चेर ‘Abbreviations’ जाग्यार ‘Abbriviations’ अशें आसा.
सोशल मिडियाचेर स्क्रीनशॉट शेअर करून आयोगाक ट्रोल करप चालू आसा. अशी चूक केल्यार तांचे गूण काडटले काय असो प्रस्न उमेदवार विचारतात. प्रूफरीडिंगांत चूक जाल्या अशें तज्ञांनी सांगलें. फॉर्म भरतना जतनाय घेवची.
आयोगाच्या वेवसायीकपणाचेर प्रस्नचिन्न
युपीएससी ही भारत सरकाराची घटनात्मक संस्था. देशा खातीर पात्र आनी प्रामाणीक अधिकारी वेंचपाची जापसालदारकी ताचेर आसता. नागरी सेवा परिक्षे वरवीं भरती केल्ले अधिकारी कलेक्टर, एसपी आनी डिप्लोमेट ह्या सारक्या वेगवेगळ्या पदांचेर काम करतात.
अधिकृत अधिसुचोवणेंतल्यो इतल्यो मुळाव्यो शुध्दलेखन आनी व्याकरणीक चुको आयोगाच्या वावराच्या खरपणाचेर आनी वेवसायीकपणाचेर प्रस्न उप्रासतात अशें समीक्षक म्हणटात.
अर्ज करपाची प्रक्रिया सुरू
त्रुटी आसून लेगीत सीएसई २०२६ खातीर अर्ज करपाची प्रक्रिया सुरू जाल्या आनी ती अधिकृत वॅबसायट upsconline.nic.in वरवीं २४ फेब्रुवारी २०२६ मेरेन चालू उरतली.
हाचे खाला नागरी सेवा परिक्षा २०२६ त ९३३ आनी भारतीय रान सेवा २०२६ खातीर ८० पदां आसात.दर वर्सा लाखांनी उमेदवार हे परिक्षे खातीर अर्ज करतात.
२०२५ वर्सा १० लाखां परस चड उमेदवारांनी अर्ज सादर केल्ले. तातूंतले ४,१६१ उमेदवार प्राथमीक परिक्षा पास जाले, २,७३६ उमेदवार मुलाखतीच्या पांवड्यार पावले. तातूंतले ९७९ जाणांची निवड जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
