भांगरभूंय | प्रतिनिधी
म्हापशें ः मार्ना, शिवोले शॉर्ट सर्कीटाक लागून घराक उजो लागिल्ल्यान घर धनी फेड्रीक डिसोझा (७३) हे जखमी जाले. तांचेर गोमेकॉत उपचार सुरू आसात. हे घडणुकेंत सुमार २ लाखांचें लुकसाण जालें.
ही घडणूक बुधवारा रातच्या ९.४५ वरांचेर घडली. डिसोझा हांच्या घरांतल्या इर्न्व्हटरांत शार्ट सर्कीट जाली आनी उजो लागलो. उज्यांत इर्न्व्हटरा सयत घरांतली टीव्ही, एसी, खाट आनी हेर सामान लासलें.
डिसोझा हांचे शेजारी राजेश रिवणकार हांकां हें समजलें तेन्ना तांणी डिसोझा हांका घरा भायर काडलो. तो मेरेन उज्यान खांट लाशिल्ली आनी तातूंत डिसोझा हांचें आंग लासलें. उपरांत तांकां ऍम्बुलन्सींतल्यान शिवोले भलायकी केंद्रांत व्हेलो. उपरांत तांकां फुडल्या उपचारा खातीर गोमेकॉंत धाडलो.
जखमी फेड्रीक डिसोझा हे दुयेंत. ते व्हीलचेअरार आसतात. तांची भुरगीं विदेशांत आसतात. हाका लागून शेजारचे रिवणकार हांचेर डिसोझा हांची काळजी घेवपाची जापसालदारी दिल्या.
हे विशीं म्हायती मेळटांच म्हापशें उजो पालोवपी दळान येवपी तो पालयलो. दळाचे उपअधिकारी ओंकार कारबोटकार, जयेश कानोळकार, आकाश सावंत, गिरीश गांवस आनी तुकाराम रेडकार हांणी उजो पालयलो.
हणजूण पुलीस विशाल गांवस हांणी पंचानामो केलो. फुडलो तपास पुलीस करतात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
