भांगरभूंय | प्रतिनिधी
पणजी : तिरूमाला सोसायटीच्या शाखेंत ठेवी काडपा खातीर बुधवारचे परस आयज बिरेस्तारा गर्दी उणी आशिल्ली. मात गुंतवणूकदारांत भंय कायम आसा. तिरूमाला तिरूपती सोसायटीचे प्रतिनिधी आयज सांजेवेळार सहकार निबंधक कार्यालयाच्या अधिकार्यांक मेळटली अशी म्हायती सुत्रांनी दिली. कागदपत्रां सादर करूंक नाशिल्ल्यान तिरूमाला सोसायटीबद्धलची स्थिती तशीच आसा.
तिरूमाला तिरूपती सहकारी क्रेडीट सोसायटीक १३ फांटे सुरू करपा खातीर दिल्ली एनओसी ३ फेब्रुवारीक रद्द केल्ल्यान सहकार मळार बोवाळ जालो. बुधवारा राज्यांतल्या सगल्या शाखांनी खातेधारकांनी पयशे काडपा खातीर गर्दी केली. सोसायटीच्या प्रतिनिधी मंडळान मुख्यमंत्री डॉ. प्रमोद सावंत हांची भेट घेवन नोटिशी प्रमाण कागदपत्रां सादर करपाचें आस्वासन दिलें. ऑडीट अहवाल आनी कागदपत्रां सादर करी मेरेन सोसायटीचे अर्थीक स्थितीची म्हायती सरकाराक कळची ना. ऑडीट अहवाल आनी कागदपत्रां मेळ्ळे उपरांत तांची तपासणी जातली. हाचे उपरांतूच फुडलो निर्णय जातलो. आजूनय सोसायटीन कसलेच तरेचीं कागदपत्रां सादर करूंक ना, अशी म्हायती सहकार खात्यांतल्या संबंदीत अधिकार्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
