भांगरभूंय | प्रतिनिधी
कार्यवाय जालिना जाल्यार मामलेदारांचेर लेगीत जातली कारवाय
पणजी : राज्यांत ज्यो बंद वा वापरा बगर चिरेखणी (खंदक) आसात तांचे भोंवतणी सुरक्षा वणटी सयत हेर सुरक्षेचे उपाय संबंधीत धनयांनी ३० दिसांनी करचे, असो आदेश उत्तर गोंय जिल्लोधिकारी अंकीत यादव हांणी जारी केला. मामलेदारांनी सुरक्षा उपायांची पळोवणी करून अहवाल सादर करचो. मामलेदारांनी योग्य ती कारवाय केली ना जाल्यार तांचेर प्रशासकी कारवाय जातली, अशें आदेशांत स्पश्ट केलां.
आपत्ती वेवस्थापन तशेंच सुरक्षेचो उपाय म्हूण दक्षीण गोंय जिल्लोधिकार्यां कडल्यान लेगीत अश्याच स्वरूपाचो आदेश बेगीनूच जारी जातलो, अशी म्हायती गोपानी दिली.
राज्यांत सगल्या वाठारांनी बर्योच बंद वा विनावापर चिरेखणी आसात. ह्या चिरेखणी भोंवतणी सुरक्षा वणत (फेंसींग) वा हेर गरजेचे सुरक्षा उपाय नासले जाल्यार त्यो धोक्याच्यो थारतात. रातच्या वेळार गोरवां, जनावरां वा मनशां लेगीत तातूंत पडून मरपाची भिरांत आसता. पावसांत उदक भरले उपरांत चिरेखणींचो धोको आनीक वाडटा. हाचेर उपाय म्हूण सुरक्षेच्यो उपाययेवजण्यो घेवप कायद्यान बंधनकारक थारता. लोकांची सुरक्षा आनी आपत्ती वेवस्थापन कायदो २००५च्या कलम २६, ३० आनी ३४ खाला जिल्लोधिकार्यांनी हो आदेश जारी केला.
हे सुरक्षा उपाय म्हयन्या भितर धनयांनी करपाचे निर्देश :
धनी वा आस्थापनांनी सुरक्षा उपायांची कार्यवाय केल्या उपरांत जिल्लोधिकार्याक फोटो, चिरेखणीची सुवात आनी आपले सये सयत प्रमाणपत्र सादर करप गरजेचें. हाचे उपरांत मामलेदारांनी तलाठी वा हेर कर्मचार्यांवरवीं चिरे खणी भोंवतणच्या सुरक्षा उपायांची पळोवणी करून अहवाल तयार करचो. सुरक्षा उपाय केले ना जाल्यार तशें कळोवचें पडटलें. अहवाल ४५ दिसांनी सादर करप बंधनकारक आसा.
आदेशाची कार्यवाय जावंक ना वा चुकीची म्हायती दिली जाल्यार कायद्याच्या कलम ५१ खाला अर्थीक दंड वा बंदखणीची ख्यास्त जातली. सुरक्षेच्यो उपाय येवजण्यो धनयानी केल्योना जाल्यार खात्यान उपाय येवजण्यो करून खर्च धनया कडल्यान वसूल करचो. आदेशाची कार्यवाय जाली ना जाल्यार मामलेदार वा संबंधीत अधिकार्यांचेर कारवाय जातली, अशें आदेशांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
