भांगरभूंय | प्रतिनिधी
ऑगस्ट २०२७ मेरेन जोडण्यो जातल्यो पुराय
पणजी : स्मार्ट मिटराक लागून गिरायकांक विजेचो वापर, व्होल्टेज अश्या गजालींची म्हायती समजतली. हाका लागून वीज खात्याकूय अचूक म्हायती मेळटली. स्मार्ट मीटर ही काळाची गरज. मात कांय लोक फकत राजकी फायद्या खातीर स्मार्ट मिटराक विरोध करतात अशें मुखेल अभियंतो स्टीफन फर्नांडीस हांणी सांलें. बिरेस्तारा जोड वीज नियामक आयोगान (जेईआरसी) आयोजीत केल्ले जनसुनावणेंत ते उलयताले. ह्या वेळार आयोगाचे आलोक टंडन आनी ज्योती प्रसाद हांचे सयत हेर हाजीर आशिल्ले.
स्मार्ट मिटर बसयले उपरांत विजेचें दर वा वापर वाडटलो, मिटर चुकीच्यो नोंदी घेतलो ही चुकीची म्हायती. अशें जर कोणेंय सांगल्यार गिरायकांनी ताचेर विस्वास दवरचो न्हय. स्मार्ट मिटराक लागून गिरायकांक तांच्या लायटीच्या वापराचेर नियंत्रण दवरप सुरळीत जातलें. स्मार्ट मिटर ही आतां मेरेन १०२० फिडर, ५८०० शासकीय संस्थांचे इमारतींत स्मार्ट मिटर जोडणी पुराय जाल्या. जाल्यार ९ हजार ट्रान्सफॉर्मर केंद्रांक जोडणी दिवप सुरू आसा. ऑगस्ट २०२७ सगल्या गिरायकांक स्मार्ट मिटर जोडणी दितले, अशें फर्नांडीस हांणी म्हणलें.
तांणी मुखार सांगलें, कांय कारणांक लागून बंच केबल प्रकल्प येसस्वी जावंक ना. सध्या सुरू आशिल्लो जमनी पोंदच्या सरयांचो प्रकल्प उपेगी थारतलो. वीज मिटर रिडींग सहज घेवपाक मेळटले अशे सुवातेर आसप गरजेचें. जेईआरसीच्या नेमां प्रमाण राज्यांतल्या २५ हजार गिरायकांक तांचे मिटर स्थलांतरीत करून घेवचे पडटले. हे जनसुनावणेंत जेईआरसीन २०२४- २५ खातीर खात्या खातीर मंजूर केल्लो आनी प्रत्यक्षांत जाल्ल्या खर्चाचो हिशोब दिला. खात्यान चडश्या सुवातांचेर मंजुरी परस उणो खर्च केला.
गिरायकांचेर दरवाडीचो भार ना
फर्नांडीस हांणी, २०२४-२५त वीज खात्याची महसुली तूट १८१ कोटी रुपया उरली. अशें आसल्यार हाचो भार राज्य सरकार उखलतलें. गिरायकांचेर दर वाडीचें कसलेंच चेंपण घालचे ना. फाटल्या वर्सा गरजेच्यो सुविधा उबारपाच्या कामांक लागून मंजुरी पेरस भांडवली खर्चांत वाड जाली. ह्या खर्चाची म्हायती खात्याचे वेबसायटीचेर अपलोड करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
