भांगरभूंय | प्रतिनिधी
पणजी : पेडणेंच्या न्यू-वाडो, मोरजे हांगच्या मुखेल रस्त्यार आयज सकाळीं सुमार ८ वरांचेर दोन दुचाकीं मदीं अपघात जालो. हातूंत दोग तरणाटे जखमी जाले. ह्या अपघातांत बुलेट आनी फॅसिनो ह्यो दोनूय दुचाकी एकामेकाक आदळ्ळ्यो. हातूंत भाटीवाडो-मोरजेचो साहिल शेटगांवकार हो तरणाटो गंभीर जखमी जालो, ताचेर बांबोळेच्या गोमेकॉ हॉस्पिटलांत उपचार सुरू आसात. दुसरो तरणाटो प्रितेश हरमलकार (गावडेवाडो-मोरजी) हो किरकोळ जखमी जाल्ल्यान ताचे म्हापशें जिल्लो हॉस्पिटलांत उपचार चालू आसात.
हे विशीं मेळिल्ले चड म्हायती प्रमाण, दोगूय दुचाकी चालक एकामेकाचे विरुद्ध दिकेन येतना हो अपघात घडलो. ह्या धपक्यान दोनूय वाहनांचें व्हडा प्रमाणांत लुकसाण जालें. जे सुवातेर हो अपघात जालो, थंय स्पिडब्रेकर उबारपाची मागणी फाटल्या कितल्याशाच म्हयन्यां सावन थळावे करताले. मात प्रशासनान हे मागणे कडेन आडनदर केल्ल्यान आयज हो अपघात घडिल्ल्याचो आरोप थळाव्यांनी केला.
मोरजी हो पर्यटन नदरेन म्हत्वाचो भाग आशिल्ल्यान हांगा व्हडा प्रमाणांत पर्यटक आसतात. खुबशे पर्यटक भाड्यान घेतिल्लीं खाजगी वाहनां वेगान चलयतात. हॅल्मेटा बगर आनी येरादारी नेम मोडून भोंवपी ह्या पर्यटकांचेर पुलीस कसलीच कारवाय करिनात, अशी कागाळ नागरिकांनी केल्या. असल्या वेगान वाहनां चलोवपी पर्यटकांचेर कारवाय करची आनी न्यू वाड्यावेल्या मुखेल रस्त्यार बेगोबेग स्पिडब्रेकर बसोवचो अशी मागणी आतां नेट धरपाक लागल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
