भांगरभूंय | प्रतिनिधी
४० हजार रुपयांचो दंड वसूल
मडगांव: मडगांव नगरपालिका घराघरांतलो कोयर एकठांय करता आनी सध्या पालिकेन शारांतले ’ब्लॅक स्पॉट्स’य हालयल्यात. तरी खुबश्या सुवातांचेर कोयर उडयिल्ल्यान, रातच्या वेळार पालिका अभियंतो आनी कर्मचार्यांच्या पंगडान नदर दवरून कोयर उडोवप्यांक धरले. हे कारवायेंत पालिकेन ४० हजार रुपयांचो दंड वसूल केला.
मडगांव शार कोयर मुक्त करपा खातीर नगरपालिकेन विवीध उपाय येवजण्यो केल्यात. कोयर वेवस्थापना खातीर गरजेचे ट्रक, जेसीबी आनी हेर यंत्रांय उपलब्ध केल्यांत. तरी नेम मोडून कोयर उडयिल्ल्यान आतां पालिकेन खर पावलां उबारपाक सुरवात केल्या. बुधवारा मध्यानरातीं मडगाव नगरपालिकेचे अभियंते आनी कर्मचार्यांच्या पंगडान शारांत अचकीत गस्त (मिडनायट पेट्रोलींग) घातली. ह्या पंगडान विंगड विंगड सुवातांचेर लक्ष दवरून कोयर उडोवप्यांचेर व्हड कारवाय केली.
हे मोहिमे मजगतीं रस्त्याचे कुशीक आनी भौशीक सुवातांचेर कोयर उडोवप्यांक धरले. नगरपालिकेन वट्ट चार जाणांचेर कारवाय करून एकेच रातीं ४० हजारांचो दंड वसूल केलो.
शारांत सीसीटीव्ही बसोवन लेगीत कांय जाण दुचाकी वेल्यान येवन सेगीत कोयर उडयिल्ल्याचें दिसून आयलें. ह्यान पयलीं जे वाहनचालक सीसीटीव्ही फुटेजींत कोयर उडयतना दिसले तांचेर कारवाये खातीर पुलिशेंत कागाळ केल्ली. मात दुचाकीचे नंबर स्पश्ट दिसनाशिल्ल्यान मध्यान रातीचेर प्रत्यक्ष मोहीम राबोवपाचें थारायलें आनी कोयर उडोवप्यांक धरले, अशी म्हायती अभियंता दिपक फळदेसाय हांणी दिली.
मडगांव पालिका ’ब्लॅक स्पॉट्स’ नितळ करून ते सुवातेर सोबितीकरण करतात. मात, तेच सुवातेर परत कोयर उडयिल्ल्यान हो कोयर शेजारच्या पंचायत वाठारांतल्या आयिल्ल्यान समजलें. अशे तरेच्यो मोहिमो ह्यान फुडेंय चालूच उरतल्यो. शार नितळ दवरपा खातीर नागरिकांनी सहकार्य करचें आनी कोयर फकत अधिकृत कोयर संकलन गाडयांनीच दिवचो, असो उलो पालिकेन मारलो.
रायचो दुबावीत पुलिसांच्या ताब्यांत
बुधवारा रातीं दोन वरां मेरेन चलिल्ले हे मोहिमेंत ’राय’ पंचायत वाठारांतल्या एका मनशाक रंगेहात धरलो. उपरांत त्या मनशान संबंदीत आस्थापनाच्या धनयाक आपोवन घेतले. धनयान कोयर उडोवपावेल्यान पंगडा कडेन शाब्दीक वाद घाल्ल्यान ताका गाडये सयत फुडले कारवाये खातीर फातोड्डें पुलिसांच्या ताब्यांत दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
