भांगरभूंय | प्रतिनिधी
वा स्को- झुवारीनगरांतल्या बिट्स पिलानी तंत्रनिकेतनांत शिकपी चार हजार विद्यार्थी रावपाची तांक आशिल्ल्या कॅम्पसांत आनिक एके विद्याथिनीन जीव दिवपाची वायट घडणूक घडली. एक वर्सा भितर कॅम्पसांत जाल्ली ही सवी आत्महत्या. हुस्को वाडला. हाचे आदीं ओम प्रियन सिंग (डिसेंबर 2024), अथर्व देसाय (मार्च 2025), कृष्ण कासेरा (मे 2025) आनी कुशग्र जैन (ऑगस्ट 2025) (अस्वाभाविक मरण अशी नोंद) हांचो आस्पाव आसा. ह्या जीव वगडावपाच्या कारणान कॅम्पसांतले मानसीक भलायकेचेर दुबाव निर्माण जाता. हो गंभीर प्रस्न बेगोबेग वेवस्थित सोडोवन फुडारांत कॅम्पसातले आनीक जिव वगडावप टाळचे खातीर प्रशासनान बेगोबेग, पारदर्शक चवकशी करप गरजेचें.
बिट्स पिलानी कॅम्पसांत फाटल्या एका वर्सात 6 विद्यार्थ्यांनी आत्महत्या केल्या, ही फकत आंकडेवारी न्हय, तर थंयच्या शिक्षण वेवस्थेचेर दुबाव घेवापा सारकी गंभीर समस्या. स्पर्धात्मक सर्तींत सांपडून, अफाट अपेक्षांचें वजें आनी मानसीक भलायके कडेन आडनदर करून हे विद्यार्थी निमाणे अशे सुवातेर पावले की तांकां आत्महत्या होच निमाणो पर्याय अशें दिसता. ह्या सगळ्या घडणुकांचेर नदर मारल्यार तांची परिस्थिती वेगळी आसली तरी धागो एकूच आसपाक जाय, असो दुबाव.
जांणी जिवाची वाट लायली तांकां कांय जाणांक अभ्यासांत फाटीं पडपाची भिरांत, कांय जाणांचेर पालकांच्या अपेक्षांचो भार आनी कांय जाणांक अर्थीक ताण सोंसपाक कठीण जातालें काय किदें, अशे साबार प्रस्न उप्रासतात. घडये इश्ट आनी समाजा कडेन तुळा, सोशल मिडियाक लागून वाडत वचपी उण्या दर्जाची भावना आनी तांची भावनां सांगपाक आदार मेळनाशिल्ल्यान ह्या सगळ्यांचें मनोबल कोसळलें आसुये. वायट संवयेक लागून वेसनाचे भकीक पडले आसपाची शक्यताय न्हयकारपाक शकनात.
देशभरांत दर वर्सा तेरा हजार विद्यार्थी आत्महत्या करतात, म्हणल्यार सरासरी दर दिसा तिसां परस चड तरणाटे जिवीत सोंपयतात. ह्या दरेके घडणुके फाटल्यान एक कुटुंब नश्ट जाता, सपनां पुराय जायनात आनी फुडारांतलो एक उच्च शिक्षित शेणता. भुरग्यांक ल्हान पिरायेचेर ग्रेड मेळोवपाचे सर्तींत धुकलप, भुरगेपणांतली खोस मेळोवपा पासून पयस दवरून परिक्षेंत येस मेळोवप ही जिणेचें एकमेव मोख दवरतात अशें मानसोपचारतज्ञ मानतात.
अभ्यासक्रमांत भावना वेवस्थापन, आत्मविस्वास निर्माण करप, ताण हाताळपाची तांक अशी कुशळटाय नाशिल्ल्यान विद्यार्थी मानसीक नदरेन दुबळे जातात. शिक्षक संघटनाय हे विशीं गंभीर हुस्को उक्तायतात. तांच्या मतान आमचे शिक्षण वेवस्थेंत परिक्षेंतले टक्केवारीक येसस्वीपणाचो एकमेव मापदंड मानतात, पूण दरेका विद्यार्थ्याची तांक वेगवेगळी आसता. कला, खेळ, समाजीक सेवा, तंत्रीक कुशळटाय ह्या सारक्या वाठारांक तितलेंच म्हत्व नाशिल्ल्यान चडशा विद्यार्थ्यांक आपली खरी वळख सोदप कठीण जाता.
ह्या आज मेरेनच्या स घडणुकांनी पालकां मदीं भंय आनी असुरक्षेचें वातावरण निर्माण जालां. कांय जाण आपल्या भुरग्यांक चड खर नियंत्रणा खाला शिस्त लावपाचो यत्न करतात, जाल्यार कांय जाण तांचे अतिलाड करतात. पूण हे दोनूय अती विद्यार्थ्यांचे मानसीक भलायकेक हानिकारक थारता. कांय एनजीओ आनी विद्यार्थी संघटनांनी फुडाकार घेवन समुपदेशन केंद्रां आनी हेल्पलायन उक्ती करपाची मागणी केल्या. कांय कडेन खाजगी पांवड्यारय मदत मेळटा. पूण ह्यो समस्या इतले पातळ्ळ्यात की खंयचीच मोहीम वा हेल्पलायन पुरो जायना.
ह्यो आत्महत्येच्यो घडणुको समाज म्हणून आमचेर उजवाड घालतात. आमी भुरग्यांचें येसस्वीपण पळयतात, तांचें सुख न्हय. आमी रिजल्टाचेर चर्चा करतात, पूण तांच्यो भावनां आयकुपाक वेळ दिना. सर्तींनी जिखपी लोकांची आमी तोखणाय करतात, पूण अपेस आयल्यार लेगीत यत्न करपी आमकां समजनात. हो वागपाचो, दुडवांचो मानक भुरग्यांक एकसुरे करतात. हाचेर उपाय म्हणल्यार आमी शारिरीक भलायकेक जितलें म्हत्व दितात, तितलेंच पयलीं मानसीक भलायकेक दिवप. शाळांनी आनी म्हाविद्यालयांनी सल्लागार नेमचे जे विद्यार्थ्यां कडेन संवाद सादतले आनी तांचे प्रस्न आयकतले. पालकांनीय आपल्यो अपेक्षा वास्तवा कडेन जुळोवंक जाय, आनी भुरग्यांक फकत परिणामांच्या आदाराचेर न्याय दिवचे परस तांचे हितसंबंद पाळपाची संद दिवंक जाय. शिक्षण वेवस्थेंत व्हड बदल करपाची गरज आसा. निमाणें ध्येय ग्रेड आनी नोकरी मेळोवप आसूंक फावना, पूण खरें ध्येय म्हणल्यार विद्यार्थ्यांक आत्मविस्वास, संवेदनशील आनी सुखी नागरिक करप. तरणाट्यांचे जीव दिवप हें आमच्या समाजा खातीर दुख्खाचें आनी लज्जास्पद वास्तव. हें एका कुटुंबांचें लुकसाण न्हय, तर आमच्या देशाच्या भवितव्याचें लुकसाण. विशय गंभीर आशिल्यान उपाय काडप, जीव दिवपा मेरेन निर्णय घेवपा फाटलीं कारणाचो सोद घेवन उपाय काडप गरजेचें. कारण ना जाल्यार जिवीत सोंपोवप चालुच उरतलें. भुरग्यांच्या सपनांक पोसवण दिवप, शिकतना तकलेर अपेक्षाचें वजें न दिता समुपदेशान जिणेचो खरो अर्थ शिकोवप हें पालक, शिक्षक हांचें कर्तव्य. शिक्षण म्हणल्यार निकटे प्रमाणपत्र न्हय, तर जिवीत जगपाची दिका.
सुदिन वि. कुर्डीकार
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
