स्वताचो इतिहास विसरपी समाजाक फुडार ना

भांगरभूंय | प्रतिनिधी

डॉ. चोपडेंकार : राजभास दीस कार्यावळ उमेदीन

भांगरभूंय । प्रतिनिधी

पणजी : स्वताचो इतिहास विसरपी समाजाक फुडार ना. इतिहास म्हणल्यार आमचीं मुळां. तींच कापली जाल्यार आमी मुखार वचूंक शकचे नात. देखून इतिहासांतल्यान प्रेरणा घेवन वर्तमानकाळ स्थीर करून फुडारा कडेन वचपाचे आसल्यार आमची भास आनी संस्कृताय विसरून जावचें ना, अशें मत साहित्यीक डॉ. हनुमंत चोपडेकार हांणी उक्तायलें. बुधवारा 39व्या राजभाशा दिसाच्या निमतान आयोजीत केल्ले कार्यावळींत ते उलयताले. ह्या वेळार डॉ. नितीन बोरकार, दामोदर घाणेकार, विवेक पिसुर्लेकार हाजीर आशिल्ले.

डॉ. चोपडेकार हांणी सांगलें, राजभाशे संबंदीं वेगवेगळे ‘मत गट’ आसात. 4 फेब्रुवारी 1987 दिसा गोंय विधानसभेच्या खाशेल्या अधिवेशनांत राजभाशा कायदो संमत जालो. हातूंतल्यान गोंयची फक्त भाशा न्हय तर प्रादेशीक अस्मिताय तिगोवन दवरपाचो यत्न जालो. आयज दरेक गोंयकाराक, खास करून तरणाट्या पिळगेक फायदो जाता. 16 जानेवारीक आस्मिताय दीस मनोवपाचें थारायलां, हाका आमी तेंको दिवपाक जाय. सरकाराच्या आदाराक लागूनच अशे कायदे शक्य आसात.

गोंयचो बरोच व्हड इतिहास आसा. नवे पिळगेन हे विशीं जाणून घेवपाची गरज आसा. गोंयांतल्या तरणाटे पिळगेक कोंकणी भास, साहित्य, संस्कृताय हांचे विशीं चड म्हायती ना. सध्याचे पिळगेक आपल्या जिवितांत भास आनी संस्कृतायेचें म्हत्व कितें हाची जाणीव ना. हे खातीर अशे तरेच्यो कार्यावळी घडोवन हाडप ही आमची समाजीक जापसालदारकी. दरेका गोंयकाराक राजभाशा, अस्मिताय दीस आपले दीस अशें दिसपाक जाय. एकदां आमकां हें कळ्ळें म्हणटकच आमची खरी उदरगत सुरू जातली.

…तर गोंय म्हाल जावपाचो

तरणाटे पिळगेक जनमत कौलाचो इतिहास खबर आसप गरजेचें. जनमत कौल जावंक नाशिल्लो जाल्यार गोंय महाराष्ट्रांत विलीन जावपाचें. गोंय सिंधुदुर्गांतलो एक तालुको जावपाचो. गोंयची आतां जितली उदरगत जाल्या तितली जावचीच नाशिल्ली, अशें डॉ. चोपडेंकार हांणी सांगलें.