गोंयांत आयजूय पुस्तकां विकत घेवपाची संस्कृती

भांगरभूंय | प्रतिनिधी

मुख्यमंत्री डॉ. सावंत : पणजे पुस्तक महोत्सवाचें उक्तावण

भांगरभूंय । प्रतिनिधी

पणजी : गोंयांत खावपा- पिवपाचे विवीध उत्सव जातात. मात अंदूं पयलेच खेपे व्हड प्रमाणार पुस्तक महोत्सव आयोजीत केला. हाका लागून युवा पिळगेक लेखन, वाचनाची आवड निर्माण जावन नवे साहित्यीक निर्माण जातले. गोंयांत पुस्तकां विकत घेवपाची संस्कृती आयजूय आसा. युवा पिळगी हांगाची संस्कृती विसरूंक ना, अशें मुख्यमंत्री डॉ. प्रमोद सावंत हांणी सांगलें.

बुधवारा पणजे नॅशनल बूक ट्रस्टा वतीन (एनबीटी) आयोजीत पुस्तक महोत्सवांत मुख्यमंत्री उलयताले. ह्या वेळार किरण ठाकूर, मिलिंद मराठे, युवराज मलिक, शिक्षम सचीव प्रसाद लोलयेंकार आनी हेर अधिकारी उपस्थीत आशिल्ले.

मुख्यमंत्री डॉ. सावंत हांणी सांगलें, हो महोत्सव फक्त आनंद घेवचे खातीर ना, जाल्यार गिन्यान दिवपी लेगीत आसा. हांगां देशभरांतल्या साबार प्रकाशकांची लाखांनी पुस्तकां उपलब्ध आसात. ही गोंयांतल्या विद्यार्थ्यां खातीर भांगराळी संद आसा. हे खातीर शिक्षम खात्यान हांगा भेट दिवपा संबंदांत शाळांक सुचोवणी केल्या. पालकां खातीर लेगीत हो महोत्सव फायद्याचो आसा. हालींची पिळगी मोबायल रील, सोशल मिडियांत व्यस्त आसता. ताचे बदला तांकां वाचनाची आवड लावची. सध्या मोबायलाचेर पुस्तका उपलब्ध आसतात, तरी लेगीत तीं हातांत घेवन वाचपाचो अणभव चड बरो आसता.

एनबीटीन हाचे आदीं दिल्ली अशेंच तरेचें प्रदर्शन मांडिल्लें. थंय 9 दिसांनी 500 कोटी रुपयांच्या पुस्तकांची विक्री जाली. डिजिटल युगांत लेगीत पुस्तकांची ओड कायम आसप ही बरी गजाल. हाका लागून नवे लेखक, प्रकाशक तशेंच वाचकांक उर्बा मेळटली. मराठी संगीत नाटक सर्तींत गोंयांतलीं नाटकां येस मेळयतात. हांगां आतां मराठी सयत कोंकणी भाशेंत खूब प्रमाणार लेखन जाता, ही अभिमानाची गजाल आसा, अशें मुख्यमंत्र्यान सांगलें.

‘सरकार मजत करपाक तयार’

एनबीटी वतीन दर वर्सा हो महोत्सव गोंयांत घेवपाचो विचार केलो जाल्यार गोंय सरकार सगले तरेची मजत करपाक तयार आसा. विकसीत भारताची सुरवात विकसीत वाचकां पसून जातली, अशें महोत्सव विकसीत भारताची बुन्याद थारतली, अशें मुख्यमंत्री डॉ. प्रमोद सावंत हांणी सांगलें.