भांगरभूंय | प्रतिनिधी
पणजीः काँग्रेस विधीमंडळ पक्ष (सीएलपी) जिल्हो पांवड्यार “आवाज तुमचो, सांगात आमचो” जनसंपर्क उपक्रम सुरू करतलो. हाचे वरवीं विधानसभा अधिवेशनांत आनी हेर माचयेर सादर करपाक नागरिकां कडल्यान सुचोवण्यो आनी प्रस्न मागयतले.
नागरिकांनी सुचोवण्यो [email protected] ह्या ईमेलाचेर धाडच्यो वा 7498 254 726 ह्या नंबराचेर संपर्क करचो असो उलो काँग्रेसीन मारला.
पत्रकार परिशदेंत सीएलपीचे फुडारी युरी आलेमांव, हळदोणेचे आमदार अॅड. कार्लोस फेरेरा आनी केपेंचे आमदार आल्टन डिकोस्टा हाजीर आशिल्ले.
ह्या उपक्रमांतल्यान गांवांक, शारांक आनी गोंयच्या म्हत्वाच्या प्रस्नांचेर आपल्यो सुचोवण्यो आनी कल्पना मांडच्यो अशें लोकांक आवाहन करतात. ‘आवाज तुमचो, सांगात आमचो’ वरवीं आमी गोंयकारां कडेन थेट संवाद सादपाचो आनी विधानसभा अधिवेशनांत आनी हेर माचयेर तांचे प्रस्न मांडपाचो यत्न करतले अशें आलेमांव हांणी सांगलें.
गोंयच्या लोकां वांगडा आमी आसात आनी ते आमकां ते जे प्रस्न सांगतलें तें आमी मांडटले अशें आमदार फेरेरा आनी डिकोस्ता हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
