भांगरभूंय | प्रतिनिधी
कार्यावळींत हजेरी लावपी 80 टक्के लोक सामाधानी: मुख्यमंत्री
भांगरभूं । प्रतिनिधी
पणजी : राज्य तशेंच केंद्र सरकाराच्या येवजणेची म्हायती दिवपा सयत अर्ज घेवपाची वेवस्था आसपी ‘सरकार तुमच्या दारार’ ही कार्यावळ येत्या 6 फेब्रुवारी सावन परतून सुरू जाता. फोंडेंच्या राजीव गांधी कला मंदीरात ह्या उपक्रमा खाला पयली कार्यावळ 6 फेब्रुवारीक सकाळीं 9 ते सांजेच्या 5 मेरेन जातली. सरकार तुमच्या दारार कार्यावळींत हजेरी लावपी 80 टक्के लोक समाधानी आसतात हो म्हजो अणभव असा अशें मुख्यमंत्री डॉ. प्रमोद सावंत हांणी सांगलें.
मुख्यमंत्री डॉ. प्रमोद सावंत हांणी बुधवारा पर्वरी मंत्रालयात पत्रकार परिशद घेतली. सरकार तुमच्या दारार हो उपक्रम सरकार परतून सुरू करता. फाटले खेपे राज्यांत सरकार तुमच्या दारारच्यो 18 ते 19 कार्यावळी जाल्ल्यो. दरेकी कार्यावळीक दोन ते अडेच हजार लोकांची उपस्थिती आसताली. कार्यावळीक येता तातुंतले 80 टक्के लोक समाधानी आसता. हाका लागून हो उपक्रम परतून सुरू करपाचो निर्णय घेतला. पयली कार्यावळ फोंडें जातली. हाचे उपरांत पुराय राज्यांत कार्यावळी जातल्यो, अशें मुख्यमंत्र्यांनी सांगलें.
मुख्यमंत्री रोजगार येवजण, स्टार्ट अप येवजण, म्हजे घर, गृहआदार अशा येवजणेंची म्हायती दिवपा सयत अर्ज भरपाची वेवस्था आसतली. हे भायर आवश्यक ते दाखले लेगीत ऑन द स्पॉट दिवपाची वेवस्था सरकार तुमच्या दारार कार्यावळींत आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
