भांगरभूंय | प्रतिनिधी
दीनदयाळ ग्रामीण कुशळटाय येवजणे खाला उपक्रम
भांगरभूंय । प्रतिनिधी
पणजी : राज्यांत यत्ता 8वी ते 10वी मेरेनचे शिक्षण घेतिल्ल्या बेरोजगारांक 3 म्हयने वा 6 म्हयन्याचे प्रशिक्षण घेवन नोकरेची संद उपलब्ध करपी येवजण गोंय सरकार चालीक लायतलो. प्रशिक्षण घेतले उपरांत 70 टक्के तरणाट्यांक खाजगी नोकरी मेळटली, अशी म्हायती मुख्यमंत्री डॉ. प्रमोद सावंत हांणी दिली. दीनदयाळ ग्रामीण कुशळटाय येवजणे खाला हो उपक्रम सुरू जातलो.
पर्वरी मंत्रालयात पत्रकार परिशद घेवन डॉ. सावंत हांणी ही म्हायती दिली. भारत सरकार आनी राज्य सरकाराच्या जोड पालवान 3 म्हयने आनी 6 म्हयने अशा दोन पावंड्यार प्रशीक्षण दिवपाची येवजण आसा. प्रशिक्षणाच्या काळांत दिसाक 160 रूपया प्रमाण विद्यावेतन (स्टायफंड) दितले. प्रशिक्षणा खातीर कसलेच शुल्क आसचे ना. राज्यांत 17 सुवातांचेर प्रशिक्षण वर्गाचे आयोजन जातलें. आतां मेरेन 300 तरणाट्यांची नोंद जाल्या. इत्सुकांनी नाव नोंदणी करून लाव घेवचो, असो उलो मुख्यमंत्री डॉ. प्रमोद सावंत हांणी केलो.
तरणाट्यां खातीर 18 ते 35 जाल्यार महिला, एससी, एसटी हांचे खातीर 18 ते 45 अशी पिरायेची अट आसा. पंचायती कडल्यान उत्पन्नाचो दाखलो घेवन तो सादर करचो पडटलो. प्रशिक्षणा उपरांत फ्रंट ऑफीस, हावज कीपींग, फूड अॅंड बीवरेज, रिटेल सेल हातूंत नोकऱ्यो उपलब्ध जातल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
