अंशुमन, रुची, अॅरोन, गाल्या हांकां दोट्टी मुकूट

भांगरभूंय | प्रतिनिधी

मडगांवच्या बीपीएस स्पोर्ट्स क्लबा वतीन आयोजीत केल्ले अखील गोंय राज्य मानांकन टेबल टॅनीस सर्तींत अंशुमन अगरवाल, रुची किर्तनी, गाल्या फर्नांडीस आनी अॅरोन फारियास हांणी दोट्टी किताब जिखलो. सर्त फातोड्डेंच्या इन्डोर स्टेडियमांत जाली.

अंशुमनान दादल्यांच्या एकोड्या गटांत आनी 19 वर्सां पिराये सकयल्या चल्यांच्या एकोड्या गटांत, रुचीन बायलांच्या एकोड्या गटांत आनी 13 वर्सां पिराये सकयल्या एकोड्या गटांत, गाल्या हिणें चलयांच्या 19 वर्सां पिराये सकयल्या एकोड्या गटांत आनी 15 वर्सां पिराये सकयल्या गटांत, अॅरोनान चल्यांच्या 17 वर्सां पिराये सकयल्या गटांत आनी 15 वर्सां पिराये सकयल्या गटांत वस्तादपण जोडलें.

इनामां भेटवण सुवाळ्याक गोंय खेळां प्राधिकरणाचे कार्यकारी संचालक अजय गावडे, टेबल टनीस खेळगडी तानिसी किर्तनी, बीपीएस क्लबाचे अध्यक्ष संतोष जॉर्ज, सचीव योगिराज कामत, भांडारी प्रसाद चिटणीस आनी हेर पदाधिकारी उपस्थीत आशिल्ले.

निमाणो निकालः 11 वर्सां पिराये सकयलो गटः (चलयो) इशिता कुलासो जैत आड वैष्णवी सिंग (3-0), (चले) चंदन कारे जैत आड ध्रुव कामत (3-0), 13 वर्सां पिराये सकयलो गटः (चलयो) रुची किर्तनी जैत आड प्रज्ञा कारे (3-0), (चले) अथर्व धुळापकार जैत आड चंदन कारे (3-0), 15 वर्सां पिराये सकयलो गटः (चलयो) गाल्या फर्नांडीस जैत आड लिओमा फर्नांडीस (3-0), (चले) अॅरोन फारियस जैत आड अक्षण लवंदे (3-2), 17 वर्सां पिराये सकयलो गटः (चलयो) लिओमा फर्नांडीस जैत आड उर्वी सुर्लेकार (3-2), (चले) अॅरोन फारियस जैत आड शांतेश म्हापशेंकार (3-0), 19 वर्सां पिराये सकयलो गटः (चलयो) गाल्या फर्नांडीस जैत आड समायरा सुवारीस (3-1), (चले) अंशुमन अगरवाल जैत आड अक्षण लवंदे (3-0), बायलांचो एकोडो गटः रुची किर्तनी जैत आड अनुश्री नायक (3-2), दादल्यांचो एकोडो गटः अंशुमन अगरवाल जैत आड नोएल नोरोन्हा (4-1).