भांगरभूंय | प्रतिनिधी
पणजीः गोंय सरकाराच्या शिक्षण संचालनालयान येवपी शिक्षणीक वर्स 2026-27 खातीर अधिकृत वेळापत्रक आनी सुटयेची वळेरी जाहीर केल्या. ह्या नव्या वेळापत्रका प्रमाण, यत्ता पयली ते पांचवी आनी इकरावेचे शिक्षणीक वर्स 6 जून 2026 सावन सुरू जातलें. हेर यत्तांचे सत्रांच्यो आनी सुटयेचींच्यो तारखो जाहीर केल्यात. संचालनालयान जारी केल्ल्या आदेशा प्रमाण हे वेळापत्रक राज्यांतल्या सगळ्या शिक्षणीक संस्थांक लागू जातले.
नव्या शिक्षणीक वर्साचें पयलें सत्र 1 एप्रील 2026 सावन सुरू जातलें आनी 10 ऑक्टोबर 2026 मेरेन चलतले. ते उपरांत दुसरें सत्र 12 ऑक्टोबर 2026 सावन सुरू जातलें आनी 24 मार्च 2027 मेरेन चलतले. मुळाव्या, माध्यमीक आनी उच्च माध्यमीक शाळां खातीर पुराय शिक्षणीक वर्सांत वट्ट कामाचे दीस 220 परस उणे आसूंक जायना. जाल्यार प्रत्यक्ष अध्यापनाचे दीस उण्यांत उणें 200 आसप सक्तीचें आसा अशें शाळेच्या कामाच्या दिसां विशीं शिक्षण संचालनालयान स्पश्ट केलां.
चवथीची सुटी 14 सप्टेंबर ते 19 सप्टेंबर 2026 मेरेन आसतली. दिवाळेची सुटी 2 नोव्हेंबर ते 21 नोव्हेंबर 2026 मेरेन आसतली, जाल्यार नातळाची सुटी 24 डिसेंबर 2026 ते 2 जानेवारी 2027 मेरेन आसतली. गिमाळी सुटी 1 मे 2027 सावन सुरू जावन 5 जून 2027 मेरेन आसतली. ते भायर शाळा मुखेल्यांक तांच्या अधिकारांत 10 स्वेच्छा सुटयो दिवपाची परवानगी आसतली. तातूंतल्या 4 सुटयो चवथी खातीर आनी उरिल्ल्यो 6 सुटयो पालक-शिक्षक संघटने कडेन चर्चा करून थारावंक येता.
परिक्षेच्या वेळापत्रका संबंदीय संचालनालयान म्हत्वाची म्हायती दिल्या. पयली सत्र परिक्षा 10 ऑक्टोबर 2026 मेरेन पुराय करप गरजेची. जाल्यार दुसऱ्या सत्राची परिक्षा 13 मार्च 2027 मेरेन घेवची पडटली. निमाणे परिक्षेचो निकाल 31 मार्च 2027 पयलीं जाहीर जावचो ना हेंय शाळांनी लक्षांत घेवचें. तशेंच विद्यार्थ्यांची शिक्षणीक वरां उण्यांत उणी 5 वरां आनी 30 मिनटां आसपाक जाय अशेंय ह्या आदेशांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
