भांगरभूंय | प्रतिनिधी
पणजीः हरित उर्जा संबंदीत म्हत्वाची कामगिरी करुन गोंयान फाटल्या णव म्हयन्यांत हरित उर्जेचे क्षमतेंत 25 टक्क्यां परस चड वाड केल्या. ही वाड गोंयची हरित उर्जेची मोख पुराय करपा खातीर एक बळिश्ट पावल म्हणून पळयतात.
गोंयान 2030 मेरेन 150 मेगावॅट (MW) अक्षय ऊर्जा निर्माण करपाची मोख दवरलां. आतां मेरेन 73.43 मेगावॅट हरित उर्जा तयार करपाचें लक्ष्य पुराय केलां. 2019त राज्याच्या सौर उर्जा मोहिमेक लागून सुरवाती सावन अक्षय उर्जा निर्मितींत सेगीत आनी नेटान वाड जाल्या.
1 एप्रिल 2025 ते 31 डिसेंबर 2025 ह्या काळांत सौर उर्जेची क्षमता 58.43 मेगावॅट वयल्यान 73.43 मेगावॅट मेरेन वाडली. म्हळ्यार सुमार 25.67 टक्के इतली वाड जाल्या. छप्पराचेर सौर उर्जा कार्यावळीक गती मेळपाक लागल्या. आतां मेरेन छप्पराचेर सुमार 64 मेगावॅट ऊर्जा तयार करपाचें लक्ष्य पुराय जावपाक लागलां. डिसेंबराच्या निमाणे मेरेन राज्यांत वट्ट सौर उर्जेची प्रतिश्ठापना 71.44 मेगावॅट आशिल्ली.
ते उपरांत सौर उर्जा निर्मिती आनीक वाडली तरी हेर अक्षय उर्जा स्त्रोत व्हडा प्रमाणांत स्थिर उरला. बायोगॅस आनी कोयर-उर्जा प्रकल्पांतल्यान वीज निर्मिती 1.94 मेगावॅट इतलीच उरली. जलविद्युत निर्मिती फकत 0.05 मेगावॅट मेरेन मर्यादीत आसा.
सध्या गोंयची दिसपट्टी विजेची मागणी सुमार 540 मेगावॅट आसा. ‘पीक अवर्स’ वेळार ती सुमार 750 मेगावॅट मेरेन वाडटा. गोंय राज्य उर्जा व्हिजन 2050 प्रमाण, 2030 मेरेन 150 मेगावॅट अक्षय उर्जा निर्माण करप आनी 2050 मेरेन पुरायपणान अक्षय उर्जेचेर चलपी देशांतलें पयलें राज्य करपाचो राज्याचो हेत आसा. तशेंच 2030 मेरेन राष्ट्रीय मुजती परस एक वर्स आदीं म्हळ्यार 2029 मेरेन 500 गिगावॅट वीज क्षमता मेरेन पावोवपाची मोख राज्यान थारायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
