भांगरभूंय | प्रतिनिधी
भांगराचें नेम बदललें, लॅपटॉपाचेर सूट, नवीन बॅगेज नेम लागू
नवी दिल्ली, खबरां संस्थाः परदेशांतल्यान भारतांत येवपी प्रवाशां खातीर कस्टम शुल्कांच्या नेमांत बदल जाल्यात. भारतीय नागरिकां खातीर शुल्क मुक्त मर्यादा आतां 75,000 रुपया मेरेन वाडयल्या. तशेंच भांगरांचें अलंकार हाडपाचे नेम आतां मोला परस वजनाच्या आदाराचेर निश्चित केल्यात.
अर्थ मंत्रालयाच्या ह्या निर्णयाक लागून विमानतळां वयले कस्टम शुल्क मंजूरीची प्रक्रिया पयलीं परस वेगान आनी सोपी जातली. कागदपत्रां उणीं करपा खातीर आनी पारदर्शकता वाडोवपा खातीर हे बदल केल्यात अशें सरकारान सांगलें. हे नवे नेम 2 फेब्रुवारी 2026 सावन लागू जाल्यात.
कोणाक कितली सुट?
हवाई वा दर्या मार्गान येवपी प्रवाशां खातीर वेगवेगळे वर्ग तयार केल्यात. ही मर्यादा 50 हजार रुपया वयल्यान 75 हजार रुपया मेरेन वाडयल्या. जर रस्त्या मार्गान भारतांत येत आसल्यार खंयच्याच नागरिकाक कसलीच सामान्य शुल्क मुक्त सुट मेळची ना.
भारतीय रहिवासी: 75 हजार रुपया मेरेनचे सामान शुल्क भरी नासतना हाडूंक शकता.
भारतीय वंशाचे पर्यटक: तांचे खातीरय मर्यादा 75 हजार रुपया आसा.
परदेशी नागरिक (नॉन-टूरिस्ट व्हिसा): हांकांय 75 हजार रुपया मेरेनची सुट मेळटली.
परदेशी वंशाचे पर्यटक: तांचे खातीर मर्यादा 15 हजार रुपया वयल्यान 25 रुपया मेरेन वाडयल्या.
एअरलायन क्रू मेंबर्स: हांचे खातीर मर्यादा पयलीं सारकीच 2,500 रुपया थारायल्या.
भांगरा अलंकारांचे नेम सोंपे जाले, आतां वजना प्रमाण निर्णय घेतले
कस्टम शुल्क खात्यान भांगरा वयली दराची मर्यादा रद्द केल्या. आतां फकत वजनाचेर निर्णय घेतले. एक वर्सा परस चड काळ परदेशांत रावपी लोकांक ही सुट मेळटली.
बायलो प्रवासी: 40 ग्राम मेरेन भांगर शुल्क मुक्त हाडूंक शकतात.
हेर प्रवासी: तांचे खातीर 20 ग्रामांची मर्यादा थारायल्या.
गरजेच्या वस्तूंच्या नेमांतय बदल
लॅपटॉप: 18 वर्सां वा ताचे परस चड पिरायेच्या दरेका प्रवाशाक एक लॅपटॉप शुल्क फ्री हाडूं येता. दुसरो लॅपटॉप हाडलो जाल्यार थारावीक कस्टम शुल्क भरचें पडटलें.
पाळीव जनावर: नव्या नेमा प्रमाण पाळीव जनावरांचोय शुल्क मुक्त वर्गांत आस्पाव केला. पूण हे खातीर जनावर आयात नेमांक पाळो दिवचो पडटा.
तात्पुरतें प्रमाणपत्र: तुमी खंयचीय मोलादीक वस्तू थोड्या काळा खातीर परदेशांत व्हरतात वा परदेशांतल्यान हाडटात जाल्यार कस्टम आतां ‘तात्पुरतें बॅगेज निर्यात/आयात प्रमाणपत्र’ जारी करतले.
राबितो हस्तांतरण: 7.50 लाख मेरेन फायदो
जे लोक परदेशांतल्यान आपलें काम पुराय करून भारतांत स्थलांतरीत जातात तांचे खातीक आतां सामानांच्या वळेरी बदला रावपाच्या काळा प्रमाण मोल निश्चित केल्यात.
12 म्हयने रावल्यार: 1.50 लाख मर्यादा.
1 ते 2 वर्सां रावल्यार: 3 लाख मर्यादा.
2 वर्सां परस चड रावल्यार: 7.50 लाख मर्यादा.
डिजिटल घोशणा: आतां अॅपा वरवीं म्हायती दिवं येता
कस्टम शुल्क प्रक्रिया वेगान आनी सोपी करपा खातीर सरकारान डिजिटल प्रणालीचेर भर दिला. आतां प्रवाशांक ‘ICEGATE’ पोर्टला वरवीं वा सरकारी अॅपा वरवीं इलॅक्ट्रॉनीक घोशणा करपाक मेळटली. हाका लागून विमानतळार रेड चॅनल आनी ग्रीन चॅनल प्रक्रियेंत लागपी वेळ वाटावतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
