ना‘पाक’ भगोडे… भंयान शेंपडी घालून पळपाचो यत्न

भांगरभूंय | प्रतिनिधी

भारतीय टी-20 क्रिकेट पंगड सध्या जबरदस्त फॉर्मांत आसा. वर्ल्ड कपाची तयारी करतना भारतान आंतरराष्ट्रीय टी-20 क्रिकेटीची व्याख्याच बदलतली, असो खेळ करपाक सुरवात केल्या. भारताच्या खेळाक भिवून पाकिस्तानान आतां वर्ल्ड कपांत भारता आड खेळचे ना म्हूण जाहीर केलां. हो प्रकार भंयान शेंपडी घालून पळपाचो यत्न करपा सारकोच आसा. हातूंत तांची ना‘पाक’ रणनितीय दिसून येता. हातूंत तांचें लुकसाण जातलेंच. भारताचेंय लुकसाण जातलें, हातूंत दुबावूच ना.
पाकिस्तानान भारताक सगल्या पांवड्यार त्रास दिवप सोडूंक ना. पयलीं एक म्हण आशिल्ली ‘सोरपाक कितलेंय दूद दियात, तो घांस मारतलोच’. पाकिस्तान हो सोरोपूच. तांकां अर्थीक पांवड्यार कितलींय मजत करात, तो आपली हळशीक रणनिती चालीक लायतलोच. पाकिस्तानांत कसलेंय अरिश्ट आयल्यार भारत सरकार शेजारधर्म पाळटा. भारतांत कितलेशेच पाकिस्तानी लोक रावताले, अजुनय रावतात. कारणां वेगळीं वेगळीं आसात. पूण पाकिस्तानाक भारताच्या ह्या दयाळू धर्माची जाणविकाय ना. शिमेर आपल्यो कारवायो ते सोडिनात. आतंकवादाक पोसवण दिवप तर चालूच आसा. शांत काश्मीर अशांत करप चालूच आसा. संवसारीक पांवड्यार भारता विशीं वीख ओंकप चालूच आसा. अशा ह्या पाकिस्तानाक भारतान बुद्द शिकयल्या, शिकयत आसा, पूण अजून मेरेन तरी तांकां अक्कल म्हणटात ती येना.
बांगलादेशांत अराजकता आसा. हिंदूंचेर अत्याचार चालू आसात. ते फाटभुंयेर आयपीएलांत एक बांगलादेशी खेळगडो खेळटलो म्हूण भारतांत बोवाळ जाल्लो. मुस्तफिजूर रेहमानाक घेतला म्हूण केकेआर, शाहरुख खान हांच्या नांवांन सोशल मिडियाचेर शबै चालू आशिल्ली. वाद खुबूच चडार पडपाक लागलो म्हूण निमाणें केकेआराक मुस्तफिजुराक सोडचो पडलो. हो मुद्दो उखलून धरून बांगलादेशान आपलो हिंदू दुस्वास दाखोवन दितना भारतांत खेळचे ना म्हूण भुमिका घेतली. भारतांत सुरक्षा मेळची ना असो दावो करीत तांच्यो मॅची श्रीलंकेंत दवरपाची मागणी केली. पाकिस्तानान 4 म्हयन्यां पयलीं आपली भुमिका मांडून हायब्रीड पद्दतीन, तिसरे सुवातेर खेळपाचो प्रस्ताव दवरिल्लो. तो मानून घेवन वर्ल्ड कपाचें वेळापत्रक तयार केल्लें. जाल्यार बांगलादेशान ऐन वेळार सुवात बदलपाची मागणी केल्या. हें मतींत घेवन आयसीसीन तांची मागणी भायरायली. आपली मागणी योग्य आसा अशें दाखोवन दिवपा खातीर बांगलादेशान पाकिस्तानाच्या तेंक्यान मतदान घेवपाक लायलें. हो प्रकार नागड्यान उगड्या कडेन कपडे मागपा सारको आशिल्लो. ह्या दोगांक कोणेंच समर्थन दिवंक ना आनी तेमाक पेटिल्ल्या बांगलादेशान वर्ल्ड कपांतल्यान आपलो पंगड फाटीं घेतलो.
दुसरे वटेन बांगलादेशाक फोंडांत घालपी पाकिस्तानान मात आपल्या मंडळाचेर बंदी येतली, क्रिकेटींत बहिश्कार येतलो म्हूण वर्ल्ड कपांत खेळटा म्हूण भुमिका घेतली. मात, आतां भारता आड खेळचे ना म्हूण जाहीर करून तांणी आपली ना‘पाक’ रणनिती दाखोवन दिली. पाकिस्तानाच्या कॅप्टनान पत्रकार परिशदेंत सरकाराचेर धुकलतना आमी तांचो निर्णय मानून फुडें वता. भारता आड खेळचे ना म्हूण सांगलें. मात, ताणें सांगलें वा सरकारान सांगलें म्हूण मॅच अशी थेट दुसऱ्या पंगडाक ते मॅचीचें 2 गूण दिवपाक मेळना. मॅचीचो वेळ जाय मेरेन गूण दिवपाक मेळना. एका पंगडान आपूण खेळना म्हूण सांगलें तरी दुसरो पंगड मैदानाचेर आसपाक जाय. टॉस करपाचो वेळ जाले उपरांत मॅचीचो निकाल कितें तें जाहीर करपाक मेळटा. तेन्ना टॉसीचो वेळ जाय मेरेन मॅच रद्द जाल्ली नासता वा त्या मॅचीचे गूण दुसऱ्या पंगडाक दिले म्हूण जाहीर करपाक मेळना. तेन्ना पाकिस्ताना कडेन सुमार 2 सप्तकांचो वेळ आसा. ह्या दोन सप्तकांत ते निर्णय घेवपाक शकतात.
पाकिस्तान क्रिकेट मंडळान भारताचो आशिया कप घेवन फुज्ज्यो मारिल्ल्यो. आशिया कप हारले तरी तांणी त्या कपा वांगडा दीस काडले. तांचो हो कारनामो ताजो आसतनाच आतां भारता आड खेळना म्हूण सांगून तांणी आपली मंद बुद्धी दाखोवन दिल्या. तांकां भारता आड खेळपाचेंच नाशिल्लें जाल्यार अंडर 19 वर्ल्ड कपांत भारता आड खेळ्ळे कशे? हाचे आदीं भारताच्या अंडर 19 पंगडाक तांणी हारयिल्लें. तेन्ना आतांय जिखतले अशा आत्मविस्वासान ते आशिल्ले. भारताक हारयिल्ल्याचें समादान मेळपा खातीर तांणी ती मॅच खेळ्ळी. सेमींत पावपाक 33.4 ओव्हरींत जैत मेळोवपाक जाय आशिल्लें. पूण, तांणी सेमी प्रवेशाचो विचारूच करूंक ना, आमकां भारता आड जिखपाक जाय, अशी रणनिती करीत सुसेगाद खेळ केल्लो. तांकां हातूंत येस मेळपाची चिन्नांय दिसतालीं. 253 धांवड्यो जिखपाक जाय आनी 29 ओव्हरींत 2 बाद 151 अशी मजबूत स्थिती आशिल्ली. 21 ओव्हरींत 102 धांवड्यो हातांत 8 विकेटी अशी बरी परिस्थिती आशिल्ली. मात, तांची ना‘पाक’ रणनिती घडये वयल्याकूय आवडूंक ना. ताका लागून उपरांत तांच्यो विकेटी धडाधड कोसळ्ळ्यो आनी ते 58 धांवड्यांनी हारले.
हे वटेन तांणी भारतीय पंगडाची ताकद पळोवन शेंपडी घाली. भारता आड खेळ्ळ्यार व्हड फरकान हारतले आनी आपली धांव सरासरी देंवतली, तशेंच भारताची धांव सरासरी देमायज वाडटली, हो हिशेब करून भारताक लुकसाण करपा खातीर मास्टर प्लॅन केलो आनी भारता आड खेळचेच ना म्हूण जाहीर केलें. क्रिकेट मंडळाच्या कारभारांत सरकार मेतेर जाता तेन्ना त्या देशाचो क्रिकेट खेळ सामकोच तळाक वता, हो इतिहास आसा. पाकिस्तानाचेंय सध्या तेंच जायत आसा. फाटल्या कांय वर्सांत तांच्या पंगडाचो खेळ इतलो बाबत जाला की झिंबाब्वे सारकिल्ल्या ल्हान पंगडान तांकां घाम काडला. आतां भारता आड खेळूंक ना जाल्यार एकवेळ तांचेर व्हड कारवाय जावपाक शकता. भारत – पाकिस्तान मॅच आसा म्हूण ब्रॉडकास्ट रायट घेतना संबंदीत कंपनी खूब पयशे मेजतात. आतां ही मॅच जायना जाल्यार तांकां लुकसाण सोसचें पडटलें. तें आयसीसी कडेन ह्या मॅचींतल्यान येवपी फायद्याचो हिशेब करून आयसीसी कडेन तितल्या पयशांची सूट मागपाक शकता. जाल्यार आयसीसी सगलें आपल्या बॉल्सांतल्यान दिवची ना, आयसीसी पाकिस्ताना कडल्यान ताची वसुली करपाक शकता. पाकिस्तानान स्वता जावन पांयार चिरो मारला, अशें आमच्यांनी म्हणूं येता.
पाकिस्तानान आपली ना‘पाक’ रणनिती फाटी घेवंक ना जाल्यार ताचें मोल तांकां मेजचें पडटलें. मात, पाकिस्तान तें सांगूंक शकना, ते आपल्याचेर शेंकता तें पळोवन आमी खेळटात अशें म्हणून मैदानाचेर एकवेळ देंवत. तेन्ना भारत आड पाकिस्तान मॅच सध्या तरी रद्द जावंक ना वा ती मॅच खेळ नासतना ताचो निकाल लागूंक ना. तेन्ना 15 फेब्रुवारी मेरेन रावुया. पळोवया कितें जाता तें?

अमर पाटील
7507495151