भांगरभूंय | प्रतिनिधी
पणजी : नॅशनल बुक ट्रस्ट (शिक्षण मंत्रालय) हे संस्थेन गोंय सरकार, समर्थ युवा फावंडेशन, लोकमान्य कल्चरल फावंडेशन हांच्या जोडपालवान गोंय पुस्तक महोत्सव पणजेच्या भाऊसाहेब बांदोडकार खेळां मैदानाचेर आयोजीत केला.
4 ते 8 फेब्रुवारी अशें सेगीत पांच दीस हो महोत्सव चलतलो. हो महोत्सव म्हणल्यार पुस्तकां, विचार आनी संस्कृतीचो उत्सव. उक्तावण मुख्यमंत्री डॉ. प्रमोद सावंत हांचे हस्तुकीं जातलें. कला आनी संस्कृती मंत्री रमेश तवडकार, नॅशनल बुक ट्रस्टाचे अध्यक्ष प्रो. मिलिंद सुधाकर मराठे, शिक्षण सचिव प्रसाद लोलयेंकार, लोकमान्य कल्चरल फावंडेशनाचे अध्यक्ष किरण ठाकूर, विश्वस्त आनी मुखेल संयोजक राजेश पांडे आनी नॅशनल बुक ट्रस्टाचे संचालक युवराज मलिक हांची खाशेली उपस्थिती आसतली.
आयज जाल्ले पत्रकार परिशदेंत युवराज मलिक हांणी सांगलें, देशभरांत पुस्तकां विशीं आनी वाचन संस्कृती वाडवपाचो एनबीटीचो उद्देश, गोवा बुक फेस्टिव्हल राष्ट्रीय स्तरार विकसित करपाचो विचार चालू आसा. ह्या महोत्सवाक हेर राज्यांतल्या व्हड पुस्तक मेळ्यां सारकें स्वरूप दिवपाचो विचार आसा. सगळ्यो कार्यावळी मुफत आसतात. समाजाक परत एकदा पुस्तकां कडेन जोडपाचो मुख्य उद्देश आसा.
गोवा बुक फेस्टिव्हलांत साहित्यिक चर्चा, सांस्कृतिक कार्यक्रम आनी ल्हान भुरग्यां खातीर खासा कार्यशाळा आसात. एक ते दोन वर्सांत गोवा बुक फेस्टिव्हलाक लागून गोंय भारतांतलें एक साहित्य पर्यटन केंद्र जातलें, असो विश्वास आसा.
ह्या महोत्सवांत शंबरां वयर प्रकाशकांचे 200 स्टॉल आसतले, तातूंत इंग्लीश, कोंकणी, मराठी, आनी हेर भारतीय भाशांचो आसपाव आसा. प्रवेश फुकट आसा. सगळ्या पुस्तकांचेर 10% सवलत मेळटली. महोत्सव दर दिसा सकाळीं 11 ते रातीं 8 मेरेन उक्तो आसतलो.
गोंय: उजवाड आनी आनंदाच्यो कथा
गोंय पुस्तक महोत्सव 2026त “गोंय: उजवाड आनी आनंदाच्यो कथा” नांवाचें खाशेलें प्रदर्शन आसतलें. नॅशनल बुक ट्रस्टान उजवाडाक हाडिल्ल्या, भुरग्यां खातीर जायतीं अभिजात साहित्यां तयार करपाक योगदान दिल्ल्या, गोंयच्या कलाकारांच्या प्रतिनिधीक कलाकृतींचें प्रदर्शन जातलें. शशी शेट्ये हांच्यो गोंयचे निसर्गदृश्य, परंपरा दाखोवपी कलाकृती आनी मारिओ डी मिरांडा हांच्यो गोंयचे जिणेचो आत्मो दाखोवपी, विनोदी, शैलीदार आनी समाजीक आयामां आशिल्ल्या चित्रांच्या माध्यमांतल्यान, हे प्रदर्शन अभ्यासकांक गोंयची संस्कृती दायजाचो एक दृश्यात्मक प्रवास घडयतलें.
पुस्तकां पलतडी: दर एका पिरायेच्या वर्गा खातीर
भुरग्यां खातीर मजेशीर शिकपाचे उपक्रम, कठपुतली वांगडा कथा सांगप आनी संगीत कथा सांगपाचें सत्र, मातयेची कला, कार्टून तयार करप, पोस्टर आनी बुकमार्क तयार करप, घोशणा बरोवप, कथा , रेखांकन कार्यशाळा, प्रस्नमाची, लोकांनाच सादरीकरण आनी रावंड द रिडल सारकिल्ले परस्पर संवादात्मक सत्र आसतलें.
लेखका खातीर साहित्यीक सत्रांचे खाशेले आयोजन आसतले. देशभरांतले नामनेचे लेखक, पत्रकार, आनी विचारवंत नामनेचे व्यक्ती चर्चा, संवाद, विचारमंथन हांचे वरवीं प्रेक्षकां कडेन संवाद सादतले.
ज्येश्ठ पत्रकार आनी लेखक उदय माहूरकार, अभिनेत्री मृणाल कुलकर्णी, अविका गौर, ग्रुप कॅप्टन शुभांशू शुक्ला, राजकी विश्लेशक शांतनू गुप्ता, सिनेमा निर्माते चंद्रप्रकाश द्विवेदी, इतिहासकार मोहन शेटे, लेखिका मेधा खासगीवाले, पत्रकार एम. जे. अकबर, लेखक सुमंत बत्रा, अभिनेते अमोल पराशर, अभिनेते सचिन पिळगांवकार, साहित्य अकादमी पुरस्कार जैतीवंत सदानंद श्रीधर मोरे, कवी आनी तत्त्वज्ञ आचार्य प्रशांत हाजीर आसतले. ही सत्रां साहित्य, इतिहास, सिनेमा, अध्यात्म, भौशिक जीवन आनी समकालीन विचार ह्या विशयांचेर जातलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
